وزیر اعظم عمران خان کے دورہ کابل کے اخراجات سامنے آگئے۔

تفصیلات کے مطابق وزیر اعظم عمران خان کے دورہ کابل کے اخراجات سامنے آگئے جس کے تحت وزیر اعظم عمران خان ایک روزہ دورے پر گیارہ ہزار ڈالر اخراجات آئے۔

حکومتی ذرائع کے مطابق وزیر اعظم عمران خان کی کفایت شعاری مہم کے باعث ماضی کے مقابلے میں سب سے کم اخراجات ہوئے۔

حکومتی ذرائع کا مزید کہنا ہے کہ آصف علی زرداری نے دوہزار نو میں افغانستان کا دورہ کیا ، صدر آصف زرداری کے دورے پر 44ہزار ڈالر اخراجات آئے جبکہ سابق وزیر اعظم راجا پرویز اشرف نے 2012میں افغانستان کا دورہ کیا ،راجا پرویز اشرف کے دورہ پر 51ہزار ڈالر اخراجات آئے اور سابق وزیر اعظم نواز شریف نے 2015 میں کابل کا دورہ کیا، نواز شریف کے دورہ پر 58 ہزار ڈالر سرکاری خزانہ سے لگائے گئے۔

دوسری جانب سماجی رابطے کی ویب سائٹ پر اپنے ایک پیغام میں وزیراعظم عمران خان نے دورہ افغانستان کے حوالے سے اپنے تاثرات کا اظہار کیا ہے۔

وزیراعظم عمران خان نے دورہ افغانستان کے بعد اپنے خیالات کا اظہار کرتے ہوئے کہا ہے کہ پاکستان افغانستان میں امن کےلئے پرعزم ہے، تاہم فوج کے ذریعے مسائل کے حل پریقین نہیں رکھتا ہوں۔

یاد رہے پاکستان کے وزیراعظم عمران خان نے گزشتہ روز اپنا پہلا دورۂ افغانستان مکمل کیا جہاں انھوں نے صدر اشرف غنی سے ملاقات کی تھی۔

پاکستانی وزارت خارجہ کے مطابق وزیراعظم عمران خان افغان صدر اشرف غنی کی دعوت پر افغانستان کا دورہ کیا جہاں دوطرفہ تعلقات، افغان امن عمل، دونوں ہمسایہ ممالک کے درمیان تجارت اور دیگر باہمی دلچسپی کے امور پر بات چیت ہوئی۔

واضح رہے کہ وزیراعظم عمران خان نے افغانستان کا یہ دورہ ایک ایسے وقت میں کیا جب ایک جانب افغانستان میں امریکہ اور طالبان کے درمیان امن معاہدے ہونے کے باوجود ملک میں شدت پسندی کے واقعات میں کئی گنا اضافہ ہوا ہے۔