جس نے عید کی شاپنگ کرنی تھی کرلی جو رہ گیا سو رہ گیا، سندھ بھر میں آج سے مکمل لاک ڈاؤن نافذ کر کے تمام کاروباری سرگرمیاں بند کر دی گئیں ہیں۔

تفصیلات کے مطابق سندھ حکومت کی جانب سے جاری کردہ نوٹی فکیشن کے مطابق آج سے عید تک تمام کاروباری مراکز، مارکیٹس اور شاپنگ سینٹرز بند رہینگے۔

ذرائع کے مطابق سندھ حکومت کی جانب سے عید کی شاپنگ کےلئے دی گئی مہلت کا کل آخری روز تھا جس کے باعث بازاروں میں خریداروں کا معمول سے زیادہ رش دیکھا گیا۔

جاری کردہ نوٹی فکیشن کے مطابق اب تجارتی مراکزعید کی چھٹیوں کے بعد ہی کھلیں گے۔

واضح رہےکہ گزشتہ روزکراچی کے تاجروں نے پاکستان پیپلز پارٹی کے چئیرمین بلاول بھٹو  سے عید تک کاروبار کرنے کے لئے درخواست کی تھی۔

 چیئرمین کراچی سندھ تاجر اتحاد شیخ حبیب کا کہنا تھا کہ بلاول بھٹو سے امید ہے کہ وہ قائد عوام ذوالفقار علی بھٹو کی طرح غریب عوام کی حق کی بات کرینگے۔

انہوں نے کہاکہ اس وقت چھوٹے تاجر بدترین حالات سے گزررہے ہیں، تاجر اس انتظار میں ہیں کہ انہیں عید تک کاروبار کرنے کی اجازت دی جائے، سندھ میں کورونا کیسز کم ہیں عید کے بعد 5 دن کا لاک ڈاؤن لگایا جائے تو کوئی حرج نہیں ہے۔

چیئرمین کراچی سندھ تاجر اتحاد نے مزید کہاکہ ہم حکومت سے ہر طرح کا تعاون کرنے کو تیار ہیں، حکومت تاجروں کی آواز بنیں اور کاروبار کھولنے دیں۔