وزیراعلیٰ پنجاب سردار عثمان بزدار نے کہا ہے کہ پنجاب کا یہ بجٹ تاریخ کا پہلا اور حقیقی فلاحی بجٹ ثابت ہوگا۔
تفصیلات کے مطابق وزیر اعلیٰ پنجاب سردار عثمان بزدار کی زیر صدارت صوبائی پارلیمانی پارٹی کا اجلاس ہوا جس میں اسپیکر پنجاب اسمبلی چوہدری پرویز الہٰی ، سینئر وزیر عبد العلیم خان، صوبائی وزیر قانون راجہ بشارت، صوبائی وزیر خزانہ ہاشم جواں بخت ، دیگر وزراء اور اراکین پنجاب اسمبلی نے شرکت کی۔
وزیر اعلیٰ پنجاب نے کہا کہ اللہ تعالیٰ کا شکر ادا کرتا ہوں جس نے ہمیں عوام کی خدمت اور فلاح و بہبود کی سعادت سے سرفراز کیا۔
سردار عثمان بزدار نے یہ بھی کہا کہ پاکستان تحریک انصاف کی حکومت نے ذمہ داری سنبھالی تو پنجاب بدترین مالیاتی دور سے دوچار تھا، ایسے رنگ برنگے ڈویلپمنٹ پراجیکٹ کھڑے کئے گئے جن کی عوام کو ضرورت تھی نہ حکومت کے پاس وسائل تھے۔
وزیر اعلیٰ پنجاب کا کہنا تھا کہ گزشتہ مالی سال میں کورونا کی وجہ سے پوری دنیا کی طرح ہم بھی مشکلات سے دوچار ہوئے، مربوط معاشی پالیسیوں کے نتیجے میں پنجاب خوشحالی اور معاشی ترقی کے نئے دور میں داخل ہو رہا ہے۔
سردار عثمان بزدار کا یہ بھی کہنا تھا کہ وزیراعظم عمران خان کی قیادت اور رہنمائی میں پنجاب سمیت وطن عزیز ترقی اور خوشحالی کی صحیح سمت پر گامزن ہو چکا ہے۔
وزیر اعلیٰ پنجاب نے کہا کہ ہم اس سال ریکارڈ ترقیاتی بجٹ پیش کرنے جا رہے ہیں، ترقی کے نئے دور میں ہر شعبہ ہائے زندگی خوشحالی کے ثمرات سے مستفید ہوگا۔
عثمان بزدار نے یہ بھی کہا کہ مالی دشواریوں کے باوجود ترقیاتی بجٹ میں اضافہ کیا جارہا ہے، جنوبی پنجاب سیکرٹریٹ کے بجٹ میں اضافہ کیا جارہا ہے۔
عثمان بزدار کا کہنا تھا کہ پنجاب میں گندم کی ریکارڈ فصل ہوئی ہے، کورونا کی تیسری لہر کے معاشی اثرات سے نمٹنے کیلئے آئندہ مالی سال میں بھی ٹیکس ریلیف دیا جائے گا۔
وزیر اعلیٰ پنجاب سردار عثمان بزدار کا مزید کہنا تھا کہ بجٹ میں تجویز کردہ اقدامات سے صوبے کی معیشت پھلے پھولے گی۔اراکین اسمبلی سے ملاقاتوں کا سلسلہ بجٹ اجلاس کے دوران بھی جاری رہے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News