پاکستان پیپلز پارٹی کی مرکزی سیکریٹری اطلاعات شازیہ مری نے کہا ہے کہ پاکستان میڈیا ڈویلپمنٹ اتھارٹی کے ذریعے حکومت اندھیرا لانا چاہتی ہے۔

تفصیلات کے مطابق پاکستان میڈیا ڈویلپمنٹ اتھارٹی کے خلاف صحافتی تنظیموں کے احتجاجی مظاہرے میں پاکستان پیپلز پارٹی کی مرکزی سیکریٹری اطلاعات شازیہ مری نے خطاب کرتے ہوئے کہا کہ تمام اپوزیشن جماعتیں اس بل کو مسترد کرتی ہیں۔

انہوں نے مزید کہا کہ پی ایم ڈی اے میڈیا کو کنٹرول کرنے کا ارادہ ہے، پی ایم ڈی اے کے ذریعے حکومت ایک اندھیرا لانا چاہتی ہے۔

اس موقع پر شاہد خاقان عباسی نے کہا تھا کہ میڈیا ورکرز کے احتجاج میں برابر کے شریک ہیں، پوری دنیا میں صحافت آزاد سے آزاد تر ہوتی جارہی ہے۔

انہوں نے یہ بھی کہا تھا کہ پاکستان میں ایسے قوانین متعارف کروائے جا رہے ہیں کہ کس طرح صحافت کو کنٹرول کیا جائے۔

پاکستان میڈیا ڈویلپمنٹ اتھارٹی کے خلاف صحافتی تنظیموں کے احتجاجی مظاہرے میں اپوزیشن جماعتیں ن لیگ، پی پی، جے یو آئی (ف) کے نمائندے اور اراکین قومی اسمبلی نے شرکت کی۔

واضح رہے اس سے قبل پاکستان پیپلز پارٹی کی مرکزی سیکریٹری اطلاعات شازیہ مری  نے مزید کہا کہ پی ٹی آئی حکومت کے چند کارناموں میں  مہنگائی، بیروزگاری اورغربت میں اضافہ ہے ۔ تین برسوں میں پیٹرول کی قیمتوں میں مستقل اضافہ، ادویات کی قیمتوں میں بے انتہا اضافہ بھی چند نمایاں کارنامے ہیں۔