ترجمان دفتر خارجہ عاصم افتخار احمد نے کہا ہے کہ بھارتی قابض افواج نے کشمیریوں پر ناقابل تصور مظالم کیے ہیں۔

اپنے بیان میں ترجمان دفتر خارجہ عاصم افتخار احمد نے کہا کہ پاکستان کو مقبوضہ کشمیر میں ساڑھے 5 ہزار اضافی قابض دستوں کی تعیناتی پر گہرے تحفظات ہیں۔

ترجمان دفتر خارجہ نے کہا کہ بھارتی قابض افواج نے کشمیریوں پر ناقابل تصور مظالم کیے ہیں، ان مظالم میں پیلٹ گنز کا استعمال،جعلی مقابلوں میں ماورائے عدالت قتل عام،  جبری گمشدگیاں، تشدد اور زیر حراست اموات شامل ہیں۔

 عاصم افتخار احمد کا کہنا تھا کہ پاکستان نے بھارتی ریاستی دہشت گردی،انسانی حقوق کی کثیر خلاف ورزیوں، جنگی جرائم، انسانیت کے خلاف جرائم پر ڈوزئیر عالمی برادری کو فراہم کیا ہے۔

 اپنے بیان میں انہوں  نے کہا کہ9 لاکھ قابض افواج والے دنیا کے بڑے ملٹرائزڈ زون میں اضافی دستوں کی تعیناتی مستضعف کشمیری عوام پر مظالم میں اضافے کا باعث بنے گی۔

 ترجمان دفتر خارجہ نے کہا کہ بھارتی قابض افواج کی کمیونٹی سینٹرز میں ٹہراو, شہروں میں اضافی بنکرز کی تعمیر اور روزانہ کشمیری مرد و خواتین کی جارحانہ تذلیل قابل مذمت ہے۔

 عاصم افتخار احمد کا کہنا تھا کہ پاکستان ایک مرتبہ پھر بھارت سے مقبوضہ کشمیر میں ریاستی دہشت گردی اور بربریت کو روکنے کا مطالبہ کرتا ہے۔

ترجمان دفتر خارجہ عاصم افتخار احمد  کا مزید کہنا تھا کہ پاکستان بھارت سے ایک مرتبہ پھر مقبوضہ کشمیر کا غیر انسانی محاصرہ اٹھانے کا مطالبہ کرتا ہے جبکہ پاکستان مقبوضہ کشمیر کے عوام کو اقوام متحدہ سیکیورٹی کونسل قراردادوں کے مطابق حق استصواب رائے کے استعمال کی اجازت دینے کا مطالبہ کرتا ہے۔