پاکستان اور مملکت سعودی عرب کے درمیان ورکرز کی بھرتی اور ہنر کی تصدیق کے معاہدوں پر دستخط ہوگئے۔
ترجمان دفتر خارجہ عاصم افتخار احمد نے اپنے ایک بیان میں کہا ہے کہ پاکستان اور سعودی عرب نے پاکستانی افرادی قوت کے لیے ورکرز کی بھرتی اور ہنر کی تصدیق کے پروگرام سے متعلق دو معاہدوں پر دستخط کیے ہیں۔
انہوں نے کہا کہ معاہدوں پر دستخط کی تقریب وفاقی وزیر برائے تعلیم، پیشہ ورانہ تربیت اور قومی ورثہ شفقت محمود کے دورہ سعودی عرب کے دوران ہوئی، ورکرز کی بھرتی سے متعلق معاہدہ مختلف پیشوں میں پاکستان سے افرادی قوت کی برآمد کے عمل کو مزید ہموار کرنے میں مدد دے گا۔
عاصم افتخار احمد کا کہنا تھا کہ یہ معاہدہ سعودی عرب میں ملازمت کرنے والے پاکستانی کارکنوں کو ان کے جائز حقوق کا تحفظ اور جامع قانونی تحفظ فراہم کرے گا جبکہ یہ معاہدہ کے تنازعات کو حل کرنے اور کسی بھی خلاف ورزی پر ریکروٹمنٹ دفاتر، کمپنیوں یا ایجنسیوں کے خلاف قانونی چارہ جوئی کرنے میں بھی مدد دے گا۔
ترجمان دفتر خارجہ نے کہا کہ پاکستانی افرادی قوت کی بیرون ملک ملازمت کو بہتر بنانے کے لیے جدید مہارتوں کی فراہمی اور سرٹیفیکیشن کو یقینی بنانا وزیراعظم کے ترجیحی شعبوں میں اہم شعبہ ہے۔
عاصم افتخار احمدکا کہنا تھا کہ ان معاہدوں پر دستخط سے پاکستان اور سعودی عرب کی مختلف وزارتوں اور محکموں کے درمیان سٹریٹجک شراکت داری اور تکمیلی تعلقات استوار کرنے کی راہ ہموار ہوتی ہے۔
ترجمان دفتر خارجہ کا کہنا تھا کہ وزیر اعظم پاکستان کے ویژن کے مطابق غیر ملکی کمیونٹی کو معیاری خدمات کی فراہمی وزارت اور بیرون ملک پاکستانی مشنز کی کلیدی ترجیح ہے۔
انہوں نے کہا کہ ہنر کی تصدیق کے معاہدے سے مملکت کو ہنر مند اور تصدیق شدہ پاکستانی افرادی قوت کی برآمد میں اضافہ ہوگا۔
ترجمان دفتر خارجہ عاصم افتخار احمد کا مزید کہنا تھا کہ ہماری ہنر مند افرادی قوت کے لیے سرٹیفیکیشن پاکستان میں تکنیکی افرادی قوت کے لیے بین الاقوامی سطح پر تسلیم شدہ تربیت اور سرٹیفیکیشن حاصل کرنے کے مواقع پیدا کرے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News