تمباکو نوشی کے مضر اثرات صرف آپ تک ہی محدود نہیں بلکہ آپ کی آنے والی نسل بھی اس سے متاثر ہوگی، تحقیق میں انکشاف۔

رپورٹ کے مطابق برسٹل یونیورسٹی میں حال ہی میں کی گئی ایک تحقیق میں یہ بات سامنے آئی ہے  کہ تمباکو نوشی کے مضر اثرات سے آپ کے ساتھ ساتھ آپ کی آنے والی نسل بھی متاثر ہو سکتی ہے۔

اس تحقیق میں بتایا گیا ہے کہ ایسی خواتین اور لڑکیاں جن کے دادا یا پردادا نے کم عمری میں تمباکو نوشی کا آغاز کیا ہو اس کا اثر ان کی پر پڑتا ہے جس سے ایسی خواتین اور لڑکیوں کی جسمانی چربی زیادہ ہوسکتی ہے یعنی یہ موٹاپے کا شکار ہوتی ہیں۔

اس سے قبل ایک تحقیق کے ابتدائی نتائج میں دریافت کیا گیا تھا کہ اگر والد تمباکو نوشی کا آغاز بالغ ہونے سے قبل کر دے تو اس کے بیٹوں میں توقع سے زیادہ جسمانی چربی ہوتی ہے۔

تاہم اب ماہرین کا ماننا ہے کہ دادا یا پردادا کا 13 سال کی عمر سے قبل تمباکو نوشی کرنا خواتین کے جسم میں چربی میں اضافے کی وجہ بنتا ہے، البتہ آنے والی نسلوں کے لڑکوں میں ایسا اثر دریافت نہیں ہوا۔

برسٹل یونیورسٹی کی جانب سے کی گئی اس تحقیق کے آغاز میں 14 ہزار حاملہ خواتین کو شامل کیا گیا تھا جو اب دادی یا نانی بھی بن چکی ہیں۔

سگریٹ نوشی پر تحقیقات کا عمل سالوں سے جاری ہے تاہم بیس سال قبل اس حقیق کے دوران سائنسدانوں نے کافی کچھ معلوم کیا جس میں ایک یہ بات بھی شامل ہے کہ کہ حمل کے دوران جو خواتین چربی والی مچھلی کھاتی ہیں چاہے 2 ہفتے میں ایک بارکھائیں، ان کے بچوں کی بینائی تیز ہوتی ہے۔

اس نئی تحقیق میں محققین نے دادا اور پردادا میں تمباکو نوشی کے ڈیٹا کی جانچ پڑتال کی مگر دادی یا پردادی وغیرہ میں اس لت کا تجزیہ نہیں کیا گیا۔

محققین نے بتایا کہ تحقیق سے 2 اہم نتائج سامنے آئے، پہلا یہ کہ بلوغت سے قبل کسی لڑکے کا تمباکو نوشی کو اپنانا آنے والی نسلوں پر اثرات مرتب کرسکتا ہے۔

دوسرا نتیجہ یہ ملا کہ بچوں میں اضافی چربی  اور صحت متاثر ہونے کی وجہ موجودہ غذا اور ورزش کے علاوہ ان کے دادا پردادا کا طرز زندگی بھی ہے جس کا تسلسل برسوں تک برقرار رہتا ہے۔

تحقیق کاروں کا کہنا ہے کہ جانوروں پر کئے گئے تجربات میں اس طرح کے اثرات ثابت ہوچکے ہیں تاہم انسانوں میں اس کی موجودگی کے بارے میں شبہات موجود ہیں۔

یہی وجہ ہے کہ اس کی تصدیق کے لیے مزید تحقیق کی ضرورت ہے اور یہ سمجھنا ہوگا کہ ایسا آخر کیوں ہوتا ہے۔