پشاور میں کورونا کے بڑھتے ہوئے کیسز کے پیش نظر شہر میں مزید 4 تعلیمی ادارے بند کردیے گئے ہیں۔

تفصیلات کے مطابق تعلیمی اداروں میں کورونا وائرس پھیلاؤ میں تیزی سے اضافے کے بعد زیادہ کیسز رپورٹ ہونے والے مزید چار اسکولوں کو بند کردیا گیا ہے۔

 ضلعی انتظامیہ کا کہنا ہے کہ پشاور میں  بند ہونے والے تعلیمی اداروں کی مجموعی تعداد 26 ہوگئی ہے۔

ضلعی انتظامیہ کے مطابق کورونا کے زیادہ کیسز رپورٹ ہونے پر تین سرکاری ایک نجی  سکول اور ایک ہاسٹل آج سے 7 روز تک بند رہیں گے۔

ڈپٹی کمشنر پشاورکا کہنا ہے کہ ضلعی انتظامیہ کی جانب سے متاثرہ تعلیمی اداروں کو فوری بند کرکے طلبہ کو قرنطینہ کی ہدایت کردی گئی ہے۔

انہوں نے مزید کہا کہ کورونا کی زیادہ شرح والے تعلیمی اداروں کو وائرس کا پھیلاؤ روکنے کے لئے بند کیا جاسکتا ہے۔

واضح رہے کہ پاکستان میں کورونا وائرس سے مزید 32 افراد جاں بحق ہو گئے، جس کے بعد اموات کی مجموعی تعداد 29 ہزار 301 ہو گئی ہے۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گزشتہ 24 گھنٹوں کے دوران مثبت کیسز کی شرح نو اعشاریہ چھ پانچ فیصد ریکارڈ کی گئی۔

این سی او سی کے مطابق پاکستان میں کورونا کے تصدیق شدہ کیسز کی تعداد 14 لاکھ 30 ہزار 366 ہوگئی ہے۔

نیشنل کمانڈ اینڈ آپریشن سینٹر کے اعدادوشمار کے مطابق گزشتہ 24 گھنٹوں کے دوران 5 ہزار 327 نئے کیسز رپورٹ ہوئے۔

پنجاب میں 4 لاکھ 80 ہزار 421، سندھ میں 5 لاکھ 43 ہزار 170، خیبرپختونخوا میں ایک لاکھ 94 ہزار 887، بلوچستان میں 34 ہزار 417، گلگت بلتستان میں 10 ہزار 703، اسلام آباد میں ایک لاکھ 28 ہزار 429 جبکہ آزاد کشمیر میں 38 ہزار 339 کیسز رپورٹ ہوئے۔