وزیراعظم عمران خان اور روسی صدر پیوٹن کی ملاقات کا اعلامیہ جاری کردیا گیا ہے۔

تفصیلات کے مطابق وزیراعظم عمران خان نے آج کریملن میں صدر ولادیمیر وی پیوٹن سے سربراہی ملاقات کی جس میں دونوں رہنماؤں نے دوطرفہ تعلقات کے ساتھ ساتھ باہمی دلچسپی کے علاقائی اور بین الاقوامی امور پر وسیع مشاورت کی۔

اعلامیے کے مطابق ملاقات میں توانائی سے متعلق ممکنہ منصوبوں پر تعاون پر بھی بات چیت کی گئی جبکہ دونوں رہنماؤں کے درمیان حالیہ مہینوں کے دوران ٹیلی فون پر ہونے والی بات چیت کا بھی تذکرہ کیا گیا۔

ملاقات کے اعلامیے  میں کہا گیا ہے کہ وزیراعظم نے پاکستان اور روس کے درمیان فلیگ شپ اقتصادی منصوبے کے طور پر پاکستان سٹریم گیس پائپ لائن کی اہمیت کا اعادہ کی جبکہ وزیراعظم نے روس کے ساتھ طویل المدتی، کثیر جہتی تعلقات استوار کرنے کے لیے پاکستان کے عزم پر زور دیا۔

اعلامیے کے مطابق وزیراعظم نے شنگھائی تعاون تنظیم سمیت مختلف بین الاقوامی اور علاقائی فورمز پر پاکستان اور روس کے درمیان جاری تعاون اور ہم آہنگی پر زور دیا جبکہ وزیراعظم نے انسانی بحران سے نمٹنے اور افغانستان میں ممکنہ اقتصادی بحران کو روکنے کی فوری ضرورت پر بھی زور دیا۔

اعلامیے میں کہا گیا ہے کہ وزیراعظم نے مقبوضہ کشمیر میں انسانی حقوق کی سنگین صورتحال پر روشنی ڈالی جبکہ وزیراعظم نے جموں و کشمیر کے تنازعہ کے پرامن حل کی ضرورت پر  بھی زور دیا۔

ملاقات کے اعلامیے  میں یہ بھی کہا گیا ہے کہ وزیر اعظم نے علاقائی امن و استحکام کے لیے نقصان دہ پیش رفت کو بھی اجاگر کیا جبکہ وزیراعظم نے ایسے اقدامات کی ضرورت پر بھی زور دیا جو علاقائی توازن کو برقرار رکھنے میں معاون ثابت ہوں

اس موقع پر وزیراعظم عمران خان نے روس اور یوکرین کے درمیان تازہ ترین صورتحال پر افسوس کا اظہار کرتے ہوئے کہا کہ پاکستان کو امید ہے کہ سفارت کاری سے فوجی تنازعہ کو ٹالا جاسکتا ہے۔

 وزیر اعظم نے زور دے کر کہا کہ تنازعہ کسی کے مفاد میں نہیں ہے، ترقی پذیر ممالک ہمیشہ تنازعات کی صورت میں معاشی طور پر سب سے زیادہ متاثر ہوتے ہیں۔ تنازعات کو مذاکرات اور سفارت کاری کے ذریعے حل کیا جانا چاہیے۔

عمران خان نے دنیا میں انتہا پسندی اور اسلام فوبیا کے بڑھتے ہوئے رجحانات پر تشویش کا اظہار کا جبکہ وزیراعظم نے بین المذاہب ہم آہنگی اور بقائے باہمی کی ضرورت پر بھی زور دیا۔

 وزیراعظم نے کہا کہ بین المذاہب ہم آہنگی اور تمام مذاہب کا احترام معاشروں کے اندر اور ان کے درمیان امن اور ہم آہنگی کے لیے ناگزیر ہے۔

انہوں نے کہا کہ پاکستان ایک مستحکم، پرامن اور منسلک افغانستان کے لیے عالمی برادری کے ساتھ مل کر کام کرتا رہے گا۔

وزیراعظم عمران خان نے مزید کہا کہ دوطرفہ تعلقات کا مثبت رخ مستقبل میں بھی آگے بڑھتا رہے گا، اعتماد اور ہم آہنگی کا تعلق مختلف شعبوں میں باہمی تعاون کو مزید گہرا اور وسعت دینے کا باعث بنے گا۔