آئی سی سی کے چئیرمین گریگ بارکلے نے کہا ہے کہ بھارتی ٹی ٹوئنٹی لیگ کی طوالت کے وجہ سے دو طرفہ سیریز کا انعقاد خطرے میں ہے۔

آئی سی سی چئیرمین ان دنوں بھارت میں ہیں اور وہ بی سی سی آئی کی دعوت پر آئی پی ایل کا فائنل دیکھنے بھارت آئے ہیں۔

بحالت مجبوری اور آئی سی سی کا کماؤ پوت ہونے کے ناطے گریگ بارکلے نے آئی پی ایل کو ایک شاندار ٹورنامنٹ کہا، لیکن اپنے دل کی بات بھی کہہ ڈالی۔

چئیرمین گریگ بارکلے نے خدشہ ظاہر کیا کہ اگر آئی پی ایل جیسی کرکٹ لیگ کی تعداد میں اضافہ ہوا تو خدشہ ہے کہ بین الاقوامی دو طرفہ سیریز کا انعقاد کم سے کم ہو جائے گا۔

گریگ بارکلے نے کہا کہ سیریز کے نہ ہونے سے دونوں کرکٹ بورڈز کو بھی مالی نقصان پہنچ سکتا ہے۔

آئی سی سی چئیرمین نے کہا کہ آئی پی ایل کی وجہ سے بین الاقوامی کرکٹ پر برا اثر پڑ رہا ہے۔

واضح رہے کہ انڈین پریمئیر لیگ میں گزشتہ سال تک 8 ٹیمیں حصہ لیتی تھیں اور کل 60 میچز کا انعقاد ہوتا تھا، لیکن رواں سال 2 نئی ٹیموں کی شرکت کی وجہ سے لیگ میں مزید 14 میچز کا اضافہ ہوا۔

رواں سال انڈین پریمئیر لیگ 10 ٹیموں اور 74 میچز کے ساتھ دنیا کی سب سے بڑی لیگ بن گئی ہے جس کا دورانیہ دو ماہ کا ہے۔

گریگ بارکلے نے کہا کہ آئی پی ایل اور بین الاقوامی کرکٹ کلینڈر کے مابین توازن بگڑتا جا رہا ہے، لیکن اس قسم کی لیگ مکمل طور پر رکن ممالک کے دائرہ اختیار میں ہوتی ہے۔

بارکلے نے کہا کہ رکن ممالک کی زیادہ آمدنی میں دلچسپی نے بین الاقوامی ٹیموں کے درمیان دو طرفہ مقابلوں پر کافی اثر ڈالا ہے۔

گریگ بارکلے نے کہا کہ ہم یہ جانتے ہیں کہ سال میں صرف 365 دن ہوتے ہیں ایسے میں اگر کھلاڑیوں کو پُرکشش معاوضوں پر اپنی لیگ میں کھلایا جائے گا تو اس کا براہ راست اثر آئی سی سی ایونٹ یا پھر دو طرفہ سیریز پر پڑ سکتا ہے۔

گریگ نے کہا کہ فی الحال آئی سی سی ایونٹ کو کوئی خطرہ نہیں ہے لیکن مستقبل میں آئی پی ایل ایونٹ میں مزید اضافے سے آئی سی سی ایونٹ کو خمیازہ بھگتنا پڑے گا۔

آئی سی سی کے چئیرمین نے کہا کہ ہر سال آئی سی سی کے ایونٹ ہو رہے ہیں اور اس میں کافی ٹیمیں حصہ لیتی ہیں اور اس کی مدت زیادہ لمبی ہوتی ہے۔ تو ایسا ہونے کی صورت میں دو طرفہ سیریز ہی کم کھیلی جائے گی‘۔

آئی سی سی چئیرمین گریگ بارکلے نے کہا کہ آج نہیں تو کل ہمیں اس کے بارے میں سوچنا ہو گا، رکن ممالک کو بھی اپنی ترجیحات کرکٹ کے لئے قربان کرنا ہوں گی۔

گریگ بارکلے نے کہا کہ 2 سالہ سفری پابندیوں کے بعد میں بھارت آ کر خوش ہوں اور بی سی سی آئی نے کرکٹ کے لئے شاندار کام کیا ہے۔