صوبائی وزیر پنجاب عطا تارڑ نے کہا ہے کہ رن آف الیکشن 186 ووٹ حاصل نہ کرنے پر کرایا جاتا ہے جبکہ حمزہ شہباز واضع اکثریت سے وزیراعلیٰ منتخب ہوئے ہیں۔

صوبائی وزیر پنجاب عطا اللہ تارڑ نے پریس کانفرنس کرتے ہوئے کہا کہ عمران خان نے اپنے ارکان کو پرویز الٰہی کو ووٹ دینے کا کہا تھا اور انہوں  نے ہدایات پارٹی سربراہ کے طور پر جاری کی تھیں۔

انہوں نے کہا کہ ایسی ہی ہدایات چوہدری شجاعت نے جاری کیں تو معیار بدل دیا گیا۔

انہوں نے مزید کہا کہ لوگ انصاف کے دوہرے معیار پرسوال اٹھا رہے ہیں کیونکہ چوہدری شجاعت حسین کے خط پر اعتراض کیا جاتاہے اور عمران خان کا خط معتبر سمجھا جاتا ہے۔

صوبائی وزیر کا کہنا تھا کہ ترامیم میں درج ہے کہ پارٹی سربراہ ہی ہدایات جاری کرسکتا ہے اور اگر پارٹی ہیڈ کی ہدایات اگر مقدم نہیں ہیں تو کیا ضمنی الیکشن کالعدم قراردیا جائے گا؟

ان کا کہنا تھا کہ چیئرمین سینیٹ کےالیکشن میں 7 ووٹ مسترد کیے گئے اور کہا گیا کہ ڈپٹی اسپیکر کی رولنگ کو چیلنج نہیں کیا جاسکتا ۔

انہوں نے بتایا کہ اتنا اہم معاملہ فل کورٹ کےبغیر حل نہیں ہوسکتا  ہے اور آئینی ماہرین کا کہنا ہے فل کورٹ سے معاملے میں مزید بہتری آئے گی۔

انہوں نے کہا کہ عمران خان محاذآرائی اور گالم گلوچ کی سیاست کرتاہے جبکہ ہم عوام کی حالت بہتر کرنے کیلئے ہرممکن کوشش کررہے ہیں۔