پی ٹی آئی کے چیئرمین عمران خان کا کہنا ہے کہ شہید صحافی ارشد شریف کے  بعد بول نیٹ ورک کے سی ای او شعیب شیخ کی جان کو خطرہ ہے۔

لاہور میں سینئر صحافیوں سے گفتگوکے دوران بول نیوز کو خراج تحسین پیش کرتے ہوئے عمران خان نے کہا کہ بول نیوز حق سچ کی جنگ لڑ رہا ہے۔

عمران خان نے کہا کہ  حکومت شعیب شیخ  کو سچ بولنے سے روکنے کے لیے منفی ہتھکنڈے استعمال کر رہی ہے۔ اُن پر مشکل وقت ہے، انشاء اللہ اچھا دورآنے والا ہے۔ بول نیوز ڈٹ کر ان کا مقابلہ کر رہا ہے۔

چیئرمین پی ٹی آئی نے کہا کہ حکومت میڈیا پر فاشسٹ طریقے سے ظلم کر رہی ہے۔

انھوں نے گفتگو میں مزید کہا کہ پاکستان 80 فیصد ڈیفالٹ کے قریب پہنچ گیا ہے۔ یکم جون کو بول کے سینیئر اینکر سمیع ابراہیم کو انٹرویو میں اس حوالے سے میں نے بتا دیا تھا کہ ملک اور معیشت ان سے سنبھل نہیں پائے گی۔ آج دنیا کی بڑی ریٹنگ کمپنیاں میرے خدشات کو سچ ثابت کر رہی ہیں۔

عمران خان کا کہنا تھا کہ ق لیگ ہمارے اتحادی ہیں پرویز الہی کے ساتھ بہترین اتحاد چل رہا ہے۔ مقدمے کے اندراج میں سب سے بڑی رکاوٹ سابق آئی جی پنجاب تھے۔ میں نے انتخابات میں ای وی ایم مشین سے دھاندلی رکوانے کی بھرپور کوشش کی۔ ای وی ایم کے معاملے پر نواز زرداری الیکشن کمیشن اور ہینڈلز ایک پیج پر تھے۔