بول انٹرٹینمنٹ پر اس بار دنیا کی سب سے بڑی رمضان ٹرانسمیشن کے فرائض ایک بار پھر فیصل قریشی سرانجام دیں گے۔ 

رمضان المبارک کے بابرکت اور با سعادت مہینے میں بول اپنے ناظرین کے لیے ہر سال خصوصی ٹرانسمیشن کا انعقاد کرتا ہے جس میں علم وحکمت کی محفلیں سجائی جاتی ہیں۔

اس کے علاوہ ملک کے جید علمائے کرام رمضان المبارک کی برکات سے متعلق اہم معلومات فراہم کرتے ہیں جب کہ رمضان المبارک کا استقبال اور اس مقدس ماہ کی تیاریوں کے حوالے سے بھی گفتگو کی جاتی ہے۔

پاکستان کے نمبر ون چینل بول انٹرٹینمنٹ کی جانب سے ’’رمضان میں بول‘‘ کا پرومو جاری کیا گیا ہے جس میں میزبانی کے فرائض ملک کے نامور اداکار ومیزبان فیصل قریشی انجام دیں گے۔

’’رمضان میں بول‘‘ کے پرومو میں فیصل قریشی اپنے انداز میں کہتے ہیں ’’رحمت کا مہینہ آگیا جس میں ہوگی ملاقات علمائے دین سے جو ذکر کریں گے انبیائے کرام کا اور مختلف موضوعات پر درس دیں گے جب کہ نیکی کی ترغیب دیں گے‘‘۔

’’رمضان میں بول‘‘ کے میزبان کا کہنا تھا کہ دسترخوان بھی سجے گا اور ننھے فرشتوں کے ساتھ دلچسپ باتیں بھی ہوں گی، مہمان بھی کچھ اپنے راز کھولیں گے۔

فیصل قریشی نے مزید کہا کہ ’’رمضان میں بول‘‘ میں ہوگی بچوں کی روزہ کشائی بھی اور نوجوانوں کی تقاریر بھی جو قلب کو گرما دیں گی جب کہ گونجیں گی حمد وثناء اور صحیح سوال کے جوابات دینے پر انعامات کی برسات بھی ہوگی۔