اچھے مستقبل کی تلاش میں ایک بار پھر 41 افراد کو سمندر کی بے رحم موجوں نے اپنا شکار بنا لیا۔

برطانوی خبر رساں ادارے کی خبر کے مطابق اطالوی جزیرے لیمپیڈوسا کے قریب ایک بحری جہاز کے حادثے میں 41 تارکین وطن ہلاک ہو گئے ہیں۔

حادثے میں بچ جانے والے چار افراد کے ایک گروپ نے امدادی کارکنوں کو بتایا کہ وہ ایک کشتی پر سوار تھے جو تیونس کے شہر سفیکس سے اٹلی جاتے ہوئے ڈوب گئی تھی۔

زندہ بچ جانے والے چاروں افراد کا تعلق آئیوری کوسٹ اور گنی سے ہے اور وہ بدھ کے روز لامپیڈوسا پہنچے تھے۔

رواں سال اب تک شمالی افریقہ سے یورپ جانے والے تارکین وطن میں 1800 سے زائد افراد اپنی جانوں سے ہاتھ دھو بیٹھے ہیں۔

زندہ بچ جانے والوں میں تین مرد اور ایک خاتون شامل ہیں جنہوں نے امدادی کارکنوں کو بتایا کہ وہ ایک کشتی پر سوار تھے جس میں تین بچوں سمیت 45 افراد سوار تھے۔

انہوں نے بتایا کہ کشتی، جو تقریبا 7 میٹر لمبی تھی، گزشتہ ہفتے جمعرات کو سفیکس سے روانہ ہوئی تھی، لیکن ایک بڑی لہر کی زد میں آنے کے چند گھنٹوں کے اندر ہی ڈوب گئی۔ خیال کیا جاتا ہے کہ صرف 15 افراد نے لائف جیکٹ پہن رکھی تھی۔

انہوں نے مزید کہا کہ انہیں ایک مال بردار جہاز نے بچایا اور پھر اطالوی کوسٹ گارڈ کے جہاز میں منتقل کردیا گیا۔

اطالوی کوسٹ گارڈ نے اتوار کے روز علاقے میں دو بحری جہازوں کے تباہ ہونے کی اطلاع دی تھی ، لیکن یہ واضح نہیں ہے کہ آیا یہ جہاز ان میں سے ایک ہے یا نہیں۔

تیونس کے حکام کا کہنا ہے کہ لیمپیڈوسا سے تقریبا 80 میل کے فاصلے پر واقع بندرگاہی شہر سفیکس یورپ میں تحفظ اور بہتر زندگی کے متلاشی تارکین وطن کے لیے ایک مقبول گیٹ وے ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں