قومی ٹیم کے سابق نائب کپتان شاداب خان انجری کی وجہ سے دورہ نیوزی لینڈ سے باہر ہوگئے ہیں۔
نیشنل ٹی ٹوئنٹی کپ میں سیالکوٹ کے خلاف ایک میچ کے دوران پاکستان کرکٹ ٹیم کے آل راؤنڈر شاداب خان ان فٹ ہوکر فیلڈ سے باہر چلے گئے تھے جس کے بعد وہ نیشنل ٹی ٹوئنٹی کپ کے مزید میچ نہیں کھیل سکے اور اب خبر آئی ہے کہ انہیں مکمل طور پر فٹ ہونے میں مزید وقت درکار ہے۔
کراچی میں یو بی ایل کمپلیکس میں ہونے والے میچ کے دوران شاداب خان کا پاؤں فیلڈنگ کے دوران مڑ گیا تھا جس کے بعد ساتھی کھلاڑی انہیں اپنی پیٹھ پر بٹھاکر گراؤنڈ سے باہر لے گئے تھے۔
میڈیکل رپورٹ کے مطابق شاداب خان پاؤں کی انجری کا شکار ہیں اور ان کی انجری بہتر ہونے میں مزید چار ہفتے درکار ہوں گے۔
دوسری جانب پاکستان کرکٹ بورڈ کی جانب سے شاداب خان کو میڈیکل کی تمام سہولیات ہونے کے باوجود اسٹریچر کے بجائے ساتھی کھلاڑی کے کندھے پر بٹھاکر باہر لے جانے پر بھی سخت ناراضگی کا اظہار کیا گیا ہے۔
پی سی بی راولپنڈی کی ٹیم مینجمنٹ سے ناخوش بھی ہوئی کہ جب اسٹیڈیم میں تمام سہولتیں موجود تھیں تو ایسا کیوں کیا گیا، البتہ اس واقعہ کے بعد شاداب خان جو ٹی 20 میں راولپنڈی کے کپتان تھے، ان کی عدم موجودگی میں قیادت آل راؤنڈر محمد نواز نے کی۔
واضح رہے کہ پاکستان ٹیم جنوری 2024 میں نیوزی لینڈ میں 5 ٹی 20 میچ کھیلے گی اور پہلا میچ 12 جنوری کو آکلینڈ میں کھیلا جائے گا۔
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News