لاہورہائیکورٹ نے رہائشی علاقوں میں رات گئے تک کھلے رہنے والے کیفوں کو بھاری جرمانےکرنے کا حکم دےدیا۔

سموگ تدارک کیس میں جسٹس شاہد کریم نے متفریق درخواستوں پر سماعت کرتے ہوئے پہلی بار خلاف ورزی کرنے والوں کو دو لاکھ اور دوسری بار پانچ لاکھ کاجرمانہ کردیا۔

لاہور ہائی کورٹ نے تیسری خلاف ورزی پرکیفے مستقل سیل کرنے اورتعلیمی اداروں میں خاص مٹی کےذریعے پودوں کی آبیاری کاحکم دےدیا۔

جسٹس شاہد کریم نے ایم اےاوکالج گراؤنڈ اور مندرکو بھی فوری بحال کرنے کاحکم دیا۔

وکیل درخواست گزارنے مؤقف اپنایا کہ طالب علموں کو الیکٹریک بائیک دینی چاہیے جس پرعدالت نے کہا کہ الیکٹرک بائیک کے لیےبیٹری چارجنگ کے لیے پوائنٹ کھولنے پر بھی توجہ دینا ہوگی۔

ممبر جوڈیشل واٹر کمیشن نے بتایا کہ جوہرٹاؤن ایریا میں 94 کیفے خلاف ورزی کرتے نظرآئے ہیں۔ اے سی ماڈل ٹاؤن کو اطلاع دی لیکن کوئی کراروئی نہ کی جاسکی۔ یہ لوگ یہ بھی کہتے ہیں کہ انکے پاس پولیس کی نفری نہیں ہوتی۔

واساکےوکیل میاں عرفان اکرم عدالت میں پیش ہوئے اور بتایا کہ پودوں کےلئے تیار کردہ خاص مٹی کےاستعمال سے پانی کی بچت ہوگی۔ خاص مٹی میں لگائےجانے پودوں کی بڑھوتری بھی جلد ہوتی ہے۔