شرعی بورڈ پاکستان نے صدقہ فطر اور فدیہ کی مقدار 300 روپے مقرر کر دی ہے۔

تفصیلات کے مطابق شرعی بورڈ پاکستان کے چیئرمین ڈاکٹر ظفر جلالی نے کہا کہ رواں سال ماہ صیام میں صدقہ فطر اور روزے کے کفارے کے لیے فدیہ کی مقدار 3 سو روپے مقرر کی گئی ہے۔

شرعی بورڈ پاکستان کے چیئرمین شیخ الحدیث پروفیسر ڈاکٹر مفتی محمد ظفر اقبال جلالی نے کہا کہ مخیر اور صاحب ثروت حضرات اپنی استطاعت کے مطابق صدقہ فطر اورفدیہ ادا کریں ۔

شرعی بورڈ پاکستان کے چیئرمین نے کہا کہ امسال صدقہ فطر اور ایک روزہ کا فدیہ ا ٓٹا سے  فی کس 300 روپے ہے جبکہ جو سے 600 روپے ہے۔

صدقہ فطر اور فدیہ کے لیے کھجور سے 2400 روپے اور کشمش سے 4400 روپے ہے۔

پورے ماہ رمضان کے روزے کا فدیہ گندم سے 9000 روپے، جو سے 18000 کھجور سے 72000 اور کشمش سے 132000 روپے ہے ۔

شرعی بورڈ کے چیئرمین کا کہنا تھا کہ یہ مقدار کم ازکم ہے، صاحب ثروت اور مال دار حضرات اپنی استطاعت کے مطابق اس میں اضافہ کرکے ادا کریں۔

انہوں نے کہا کہ روزہ کا فدیہ اس شخص کے لیے ہے جو دائمی مریض ہو یا شیخ فانی ہو کہ روزہ رکھنے پر قادر نہ ہو اور بظاہر تندرست ہونے کی کوئی امید نہیں ہو۔

شرعی بورڈ پاکستان کے چیئرمین ڈاکٹر ظفر جلالی نے مزید کہا کہ مسافر  اورعارضی مریض اپنے روزے کی قضاء ادا کرے کیونکہ فدیہ روزہ چھوڑنے کا بدل نہیں بن سکتا۔