آئی پی ایل کی ٹیم سن رائزز حیدرآباد نے لیگ کی تاریخ کا سب سے بڑا مجموعہ بنا دیا۔

تفصیلات کے مطابق آئی پی ایل 2024 کے میچ میں سن رائزز حیدرآباد نے ممبئی انڈینز کے خلاف لیگ کی تاریخ کا سب سے بڑا اسکور بنا دیا۔

حیدرآباد کے راجیو گاندھی اسٹیڈیم میں ہونے والے اس میچ میں ممبئی انڈینز نے ٹاس جیت کر پہلے سن رائزز حیدرآباد کو بیٹنگ کرنے کی دعوت دی۔

سن رائزز حیدرآباد نے چوکے اور چھکوں کی برسات کر کے ممبئی انڈیینز کے سامنے رنز کا پہاڑ کھڑا کر دیا، حیدرآباد نے مقررہ 20 اوورز میں 3 وکٹوں کے نقصان پر 277 رنز بنا لیے۔

اس سے قبل یہ ریکارڈ 2013 میں رائل چیلنجرز بنگلور نے پونے وارئیرز کے خلاف بنایا تھا۔ بنگلور نے 5 وکٹوں پر 263 رنز بنائے تھے۔

لیگ کی تاریخ کے اس سب سے بڑے مجموعے میں کسی بیٹسمین نے سنچری نہیں بنائی، ٹریوس ہیڈ 24 گیندوں پر 62، ابھیشیک شرما 23 پر 63 اور ایڈن مارکرم نے 28 پر 42 رنز بنائے۔

جنوبی افریقہ سے تعلق رکھنے والے جارحانہ کھیل کے ماہر ہینرک کلاسن نے صرف 34 گیندوں پر 80 رنز کی ناقابل شکست دھواں دھار اننگ کھیلی۔

اس اننگ میں سن رائزز حیدرآباد کی جانب سے مجموعی طور پر 18 چھکے اور 19 چوکے لگے۔

سن رائزز حیدرآباد کی اننگز میں مجموعی طور پر 18 چھکے اور 19 چوکے لگے، یعنی صرف 37 گیندوں پر سن رائزز حیدرآباد نے باؤنڈریز کی مدد سے 184 رنز بنائے۔

ہدف کے تعاقب میں ممبئی انڈینز کے بیٹسمینوں نے بھی بہترین کوشش کی اور مقررہ 20 اوورز میں 5 وکٹوں پر اسکور 246 تک پہنچا دیا اور صرف 31 رنز سے شکست کا سامنا کرنا پڑا۔

مجموعی طور پر اس میچ میں 523 رنز بنائے گئے۔