آل راؤنڈر عماد وسیم کو انٹرنیشنل کرکٹ سے ریٹائرمنٹ کے بعد واپسی کے سفر میں کئی مشکلات کا سامنا ہے۔
قومی کرکٹ ٹیم کے سابق 35 سالہ آل راؤنڈر عماد وسیم نے آخری ٹی ٹوئنٹی انٹرنیشنل میچ گذشتہ سال راولپنڈی میں کھیلا تھا جس کے بعد انہوں نے خود کو انٹرنیشنل کرکٹ سے علیحدہ کرلیا تھا۔
پی ایس ایل 9 میں انہوں نے شاندار کارکردگی کا مظاہرہ کرتے ہوئے 126 رنز بنانے کے ساتھ 12 وکٹیں حاصل کیں تھیں جب کہ ان کی نمایاں پرفارمنس ایلیمینیٹر 2 اور فائنل مقابلے میں ہمیں دیکھنے کو ملی جس کے بعد انٹرنیشنل کرکٹ میں ان کی واپسی کی خبریں زیر گردش ہیں۔
میڈیا رپورٹ کے مطابق چیف سلیکٹر وہاب ریاض نے تاحال عماد وسیم سے کوئی رابطہ نہیں کیا لیکن پی سی بی کے ایک عہدیدار نے ان سے مستقبل کے لائحہ عمل کے حوالے سے ضرور دریافت کیا تھا۔
رپورٹ کے مطابق بورڈ کے کچھ لوگوں کا خیال ہے کہ اب صرف نئے کھلاڑیوں کو موقع دیا جائے، کچھ لوگوں کا یہ بھی سوچنا ہے کہ اگر عماد کو واپسی لایا جاتا ہے تو وہ طویل مدت تک نہیں کھیل سکتے تاہم کپتان شاہین آفریدی اور دیگر انہیں ٹیم کے لیے موزوں سمجھتے ہیں۔
رپورٹ میں کہا گیا ہے کہ ابتدائی طور پر کسی نے چیئرمین بورڈ کو بتایا تھا کہ عماد وسیم نے قومی ٹیم کی نمائندگی کرنے سے انکار کردیا تھا لیکن بعد ازاں یہ بات بھی سامنے آئی کہ ایسی کوئی بات نہیں۔
بورڈ کے کچھ حلقوں کا یہ بھی خیال ہے کہ اگر بابر اور عماد کے درمیان کسی قسم کا کوئی اختلاف موجود ہے اور تعلقات اچھے نہیں تو انہیں پہلے ایک ساتھ بیٹھ کر اس تنازع کو حل کرنا ہوگا۔
دوسری جانب عماد وسیم بھی اپنے خدشات دور ہونے تک ریٹائرمنٹ کے فیصلے پر نظر ثانی کرنے کو تیار نہیں ہیں، انہیں تشویش ہے کہ اگر انہیں واپس بلایا جاتا ہے اور پھر ایک سیریز کے واپس بٹھادیا جاتا ہے تو اس سے مزید مسائل پیدا ہوں گے۔
علاوہ ازیں عماد وسیم کے کئی غیر ملکی لیگز کے ساتھ بھی معاہدے ہیں اور اس کے لیے انہیں پہلے مالکان سے بھی بات کرنا ہوگا تاہم اب تک انہیں پی سی بی کی جانب سے میٹنگ کا کوئی باضابطہ دعوت نامہ موصول نہیں ہوا۔
واضح رہے کہ پاکستان کرکٹ ٹیم کاکول میں فٹنس کیمپ شروع کرنے جارہی ہے جب کہ قومی ٹیم آئندہ ماہ نیوزی لینڈ کے خلاف سیریز کھیلے گی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News