آئی پی ایل میں پچز اور بولنگ کے معیار پر اکثر ہی تنقید ہوتی رہی ہےاور ایسا ہی کچھ گزشتہ روز بھی دیکھنے کو ملا۔

گزشتہ روز سن رائزرز حیدرآباد اور ممبئی انڈینز کے خلاف میچ میں فلیٹ پچ نے بولرز  کو ناکوں چنے چبوادیے اور بلے بازوں کی چاندی ہوگئی۔

ممبئی انڈینز نے ٹاس جیت کر سن رائزرز حیدرآباد کو پہلے بیٹنگ کرنے کی دعوت دی تو انہوں  نے چھکوں اور چوکوں کی برسات کردی۔

سن رائزرز حیدرآباد  نے مقررہ 20 اوورز میں 3 وکٹوں کے نقصان پر آئی پی ایل کی تاریخ کا سب سے بڑا مجموعہ (277 ) بنا ڈالا۔

اس سے قبل آئی پی ایل کی تاریخ کا سب سے بڑا اسکور رائل چیلنجرز  بنگلور نے 2013 میں پونے واریئرز انڈیا کے خلاف اسکور کیا تھا، بنگلور نے 5 وکٹوں کے نقصان پر 263 رنز بنائے تھے۔

پہلی اننگز کے بعد بظاہر تو یہی لگا کہ  سن رائزرز حیدرآباد  یہ میچ باآسانی بڑے مارجن سے جیت جائے گا تاہم دوسری جانب سے بھی چھکوں اور چوکوں کی برسات نے آسان جیت کو مشکل میں بدل دیا۔

ممبئی انڈینز میچ تو نہ جیت سکی لیکن مقررہ 20 اوورز میں 5 وکٹوں کے نقصان پر  246 رنز بنا ڈالے۔

یوں اس میچ میں مجموعی طور پر 523 رنز بنے جو کسی بھی ٹی ٹوئنٹی میچ کا ریکارڈ ساز مجموعہ ہے۔

اس میچ کے دوران مجموعی طور پر 38 چھکے بھی لگے  جو ایک ٹی ٹوئنٹی میچ میں سب سے زیادہ کا ریکارڈ ہے۔