قومی ٹیم کے سابق کپتان شاہد آفریدی اپنے داماد اور پاکستان ٹی ٹوئنٹی ٹیم کے کپتان شاہین آفریدی کی قیادت بچانے کے لیے میدان میں آگئے۔ 

کراچی میں میڈیا سے گفتگو کرتے ہوئے شاہد آفریدی نے کہا کہ پاکستان میں جب چہرے تبدیل ہوتے ہیں تو نظام بھی تبدیل ہوجاتا ہے اور نیا آنے والا سمجھتا ہے جس نے پہلے کام کیا اس نے غلط کیا اور جو اب کررہا ہے وہ ٹھیک ہے۔

شاہد آفریدی سے سوال کیا گیا کہ بابراعظم کو ایک بار پھر کپتان بنائے جانے کی خبریں گردش کررہی ہیں جس پر انہوں نے جواب دیا کہ جس کو کپتانی دی اس کو وقت بھی دیں، کپتان بنانے کا جو فیصلہ پہلے کیا گیا تھا یا تو وہ غلط تھا یا اب جو ہوگا وہ غلط ہوگا۔

خیال رہے کہ سوشل میڈیا پر گزشتہ روز سے بابراعظم کو ایک بار پھر کپتان بنائے جانے کی خبریں زیرگردش ہیں اور کہا جارہا ہے کہ شاہین آفریدی کو ناقص کارکردگی پر کپتانی سے ہٹائے جانے کا امکان ہے۔

ایک اور سوال کے جواب میں شاہد آفریدی کا کہنا تھا کہ سلیکشن کمیٹی کو با اختیار بنانے کا فیصلہ اچھا ہے، ان کے خیال میں سلیکشن کمیٹی کا ایک سربراہ ہونا چاہیے تھا، سلیکشن کمیٹی کا سربراہ نہ ہونے سے فیصلہ کرنے میں مشکل ہوگی۔

محمد عامر اور عماد وسیم کی ریٹائرمنٹ پر سابق کپتان نے کہا کہ دونوں کھلاڑیوں کی ریٹائرمنٹ لینے کا فیصلہ درست ہے اور ان کی موجودگی میں نئے کھلاڑیوں کو حوصلہ ملے گا اور انہیں سیکھنے کا موقع ملے گا۔