چئیرمین پاکستان کرکٹ بورڈ محسن نقوی نے انٹر کالجیٹ رمضان ٹی ٹوئنٹی کپ کے انعقاد کی منظوری دے دی۔

انٹر کالجیٹ رمضان ٹی ٹوئنٹی کپ پاکستان کے تین بڑے شہروں لاہور،کراچی اور اسلام آباد میں 22 مارچ سے 8 اپریل تک کھیلا جائے گا جس میں 30 کالجز حصہ لیں گے۔

لاہور میں ٹورنامنٹ کا آغاز 22 مارچ سے ہوگا جب کہ اسلام آباد اور کراچی میں میچز 23 مارچ سے شروع ہوں گے۔

چیئرمین پی سی بی محسن نقوی کہتے ہیں کہ انٹر کالجیٹ رمضان ٹی ٹونٹی کپ سے نچلی سطح پر ٹیلنٹ سامنے آئے گا۔ کرکٹ کے فروغ کے لئے اس طرح کے ٹورنامنٹ کے انعقاد کا سلسلہ جاری رکھا جائے گا۔

محسن نقوی نے کہا کہ مہارت اور جذبے کے عملی مظاہرے کے لیے ایک پلیٹ فارم فراہم کرنے سے ہی حقیقی ٹیلنٹ ابھر کر سامنے آتا ہے۔

ڈائریکٹر  ڈومیسٹک پی سی بی عبداللہ خرم نیازی نے کہا کہ ٹورنامنٹ کا انعقاد چیئرمین پی سی بی محسن نقوی کے وژن کے مطابق کر رہے ہیں، یقین ہے کہ یہ ٹورنامنٹ کچھ  ٹیلنٹ کو بھی سامنے لائے گا۔

خیال رہے کہ ٹورنامنٹ میں ہر شہر سے مجموعی طور پر 10 ٹیمیں حصہ لیں گی۔ ان ٹیموں کو دو گروپوں میں تقسیم کیا جائے گا جبکہ ہر گروپ کی ٹاپ ٹیم فائنل کھیلے گی۔

پول مرحلے میں ہر ٹیم چار میچ کھیلے گی جب کہ ہر شہر میں کل 21 میچز کھیلے جائیں گے۔ ہر ٹیم میں 14 کھلاڑیوں کا اسکواڈ اور تین ریزرو کھلاڑیوں کے ساتھ ساتھ تین آفیشلز بھی ہوں گے۔

کھلاڑیوں کے لیے شرکت کے قوانین میں عمر کی حد شامل ہے جہاں یکم ستمبر 2000 کو یا اس کے بعد پیدا ہونے والا کھلاڑی ہی اس ٹورنامنٹ میں حصہ لینے کا اہل ہوگا۔ ٹورنامنٹ میں حصہ لینے کے لیے ایک کھلاڑی کا متعلقہ کالج کا حقیقی طالب علم ہونا ضروری ہے۔

ان میچوں کے امپائرز پی سی بی کے پینل آف امپائرز سے ہوں گے۔ ہر شہر میں جیتنے والی ٹیم کو پانچ لاکھ روپے کا نقد انعام دیا جائے گا جب کہ ہر شہر میں رنرز اپ کو ڈھائی لاکھ روپے ملیں گے۔

ٹورنامنٹ کے دوران پی سی بی کے سلیکٹرز کھلاڑیوں کی پرفارمنس پر نظر رکھنے کے لیے موجود ہوں گے۔