پاکستان اور نیوزی لینڈ کے درمیان ہونے والی ٹی ٹوئنٹی سیریز کی ٹرافی کی رونمائی کر دی گئی۔

تفصیلات کے مطابق پاکستان اور نیوزی لینڈ کے درمیان 5 ٹی ٹوئنٹی میچز کی سیریز کی ٹرافی کی رونمائی راولپنڈی میں دونوں کپتان نے کر دی۔

سیریز کے حوالے سے نیوزی لینڈ ٹیم کے کپتان مچل بریک ویل نے پریس کانفرنس میں کہا کہ وقت کم تھا لیکن پاکستان کا دورہ ایک چیلنج ہے۔

کیوی کپتان نے کہا کہ دنیا کے مختلف خطوں میں کھیلنے کا تجربہ ہے، پاکستان کی ٹیم اچھی ہے اور شائقین کو اچھی کرکٹ دیکھنے کو ملے گی۔

نیوزی لینڈ ٹیم کے قائد کا کہنا تھا کہ پاکستان کے ماحول سے پہلے ہی آگاہ ہوں، کیونکہ میں کراچی میں کرکٹ کھیل کر گیا ہوں۔

اس موقع پر پاکستان کرکٹ ٹیم کے کپتان بابر اعظم نے پریس کانفرنس کرتے ہوئے کہا کہ ورلڈ کپ سے قبل 12 میچز ہیں اور ہم اپنی پوری تیاری کریں گے۔

انہوں نے کہا کہ جو غلطیاں ہوئیں ان پر قابو پانے کی کوشش کرینگے، اس وقت بہترین ٹیم کو چنا گیا ہے۔

بابر اعظم نے ایک سوال کے جواب میں کہا کہ کون ٹیم میں اوپننگ کرے گا اس کے لیے کل تک انتظارکریں۔

انہوں نے کہا کہ ہر میچ میں مختلف حکمت عملی اپنائیں گے، بولنگ میں بھی مختلف حکمت عملی ہوگی۔

گرین شرٹس کے قائد نے کہا کہ بنیادی مقصد ورلڈ کپ کے لیے ٹیم کو تیار کرنا ہے۔

بابر اعظم نے کہا کہ عثمان، شاداب اورعماد کے ساتھ بیٹنگ مضبوط ہوئی ہے، ہمارے پاس 8 نمبر تک بیٹنگ موجود ہے، افتخار، عرفان، نیازی، اعظم اچھا پرفارم کر رہے ہیں۔

پاکستان کے کپتان بابر اعظم نے مزید کہا کہ  ہر کردار کو انجوائے کرتا ہوں، اور کوشش کرتا ہوں کہ بہتر فیصلے کروں۔