ایف پی سی سی آئی کے صدر عاطف اکرام شیخ نے کہا کہ ایف پی سی سی آئی ملکی برآمدات کو 100 ارب ڈالر تک بڑھانے کا خواہاں ہے۔

فیڈریشن آف پاکستان چیمبر آف کامرس اینڈ انڈسٹری کے صدر عاطف اکرام شیخ نے پریس کانفرنس کرتے ہوئے کہا ہے کہ ملکی معیشت کی بحالی کے لیے تھنک ٹینک تشکیل دیا گیا ہے۔

انہوں نے کہا کہ سابق وزیر تجارت گوہر اعجاز کو تھنک ٹینک کی قیادت سونپی گئی ہے۔ ملک کی معیشت کو اس وقت 2030 تک بہت سے مسائل کا سامنا ہے۔

صدر ایف پی سی سی آئی نے مزید کہا کہ پاکستان کی برآمدات کو 100 ارب ڈالر تک پہنچانا ہے۔ پاکستان میں بجلی کی قیمت زیادہ ہونے کی وجہ سے صنعت متاثر ہوتی ہے۔

ایف پی سی سی آئی کے سربراہ کا کہنا تھا کہ پاکستان میں بجلی کی قیمتیں 20 سینٹ تک پہنچ گئی ہیں جو اب 9 سینٹ تک آجائیں گی.

انہوں نے مزید کہا کہ علاقائی ممالک میں بجلی 6 سے 7 سینٹ فی یونٹ پر دستیاب ہے یہی وجہ ہے کہ پاکستان کی صنعتیں علاقائی ممالک کا مقابلہ نہیں کر سکتیں۔

ان کا کہنا تھا کہ برآمدات میں اضافے کیلئے بنیادی مسائل حل کئے جائیں۔ اس وقت برآمدی صنعتیں تباہی کا شکار ہیں.

پریس کانفرنس کے دوران ایف پی سی سی آئی کے اراکین اور مندوبین نے خصوصی سرمایہ کاری سہولت کونسل کے کردار پر اعتماد کا اظہار کیا۔

ایف پی سی سی آئی کے صدر عاطف اکرام شیخ کا مزید کہنا تھا کہ ملکی معیشت کی بحالی کیلئے ایس آئی ایف سی وقت کی اہم ضرورت ہے۔