دورہ پاکستان کے لیے سینئر کھلاڑیوں سے محروم کیوی ٹیم کو پاکستان پہنچنے سے پہلے ایک اور بڑا دھچکا لگ گیا۔

تفصیلات کے مطابق نیوزی لینڈ کرکٹ ٹیم کے کئی سینئر کھلاڑی آئی پی ایل کھیلنے میں مصروف ہیں جس کی وجہ سے انہوں نے دورہ پاکستان سے معذرت کردی، ایسے میں کیویز ٹیم کے اسکواڈ میں شامل دو اہم کھلاڑی فن ایلن اور ایڈم ملنے پاکستان کے خلاف سیریز سے باہر ہوگئے ہیں۔

نیوزی لینڈ کرکٹ کے مطابق فن ایلن اور ایڈم ملنے ٹریننگ کے دوران انجری سے دوچار ہوئے جس کے بعد دونوں کھلاڑی پاکستان کے خلاف سیریز کیلئے دستیاب نہیں ہو پائیں گے۔

نیوزی لینڈ کرکٹ کے مطابق فن ایلن کمر اور ایڈم ملنے ٹخنے کی انجری کا شکار ہوئے ہیں، دونوں کھلاڑیوں کی انجری کے بعد وکٹ کیپر بیٹر ٹام بلنڈل اور آل راؤنڈر زیک فاولکس کو اسکواڈ میں شامل کر لیا گیا ہے۔

نیوزی لینڈ کرکٹ کے مطابق زیک فولکس پہلی مرتبہ اسکواڈ کا حصہ بنیں گے جب کہ ٹام بلنڈل نے گزشتہ برس بھی پاکستان کا دورہ کیا تھا۔

کیویز کرکٹ ٹیم کے کوچ گیری اسٹیڈ کا کہنا تھا کہ روانگی سے قبل اہم کھلاڑیوں کا انجرڈ ہونا بدقسمتی ہے، دونوں کرکٹرز گزشتہ ورلڈ کپ سے ہمارے لیے ٹی ٹوئنٹی میں اچھے پرفارمرز رہے ہیں۔

واضح رہے کہ نیوزی لینڈ ٹی ٹوئنٹی اسکواڈ آج پاکستان کیلئے روانہ ہوگا اور 14 اپریل کی صبح اسلام آباد پہنچے گا۔

پاکستان اور نیوزی لینڈ کی ٹیموں کے درمیان پہلا ٹی ٹوئنٹی میچ 18 اپریل کو پنڈی اسٹیڈیم میں کھیلا جائے گا۔