فرانس کے ایک شوقیہ ماہرِ معدومیات نے اپنے کتے کے ساتھ چہل قدمی کرتے ہوئے ایک حیرت انگیز فاسل دریافت کیا ہے جو 70 ملین سال قدیم ہے اور ایک ڈائنوسار کا ڈھانچہ ہے۔

25 سالہ ڈیمین بوشیٹو، نے دو سال قبل مونٹولائرز کے علاقے میں اپنے کتے کے ساتھ چہل قدمی کررہے تھے کہ انہوں نے زمین سے باہر ایک بہت بڑی پتھریلی ہڈی دریافت کی۔ جو ایک بڑے ڈائنوسار کا حصہ تھی اور اب حال ہی میں اس کا مکمل ڈھانچہ مزید کھدائی کے بعد برآمد کرلیا گیا ہے۔

چونکہ ڈیمین قدیم جانداروں اور فاسلز میں دلچسپی رکھتے ہیں، اس نے فوری طور پر پہچان لیا کہ یہ ایک غیرمعمولی رکاز ہوسکتا ہے۔ اب ماہرین نے تصدیق کی ہے کہ لمبی گردن والی نسل سے تعلق رکھنے والا ایک بہت بڑا جانور ہے یعنی ٹائٹانوسارس ہے جو سات کروڑ سال پہلے اس علاقے میں ہنسی خوشی رہا کرتا تھا۔ یہ ڈائنوسار کی سب سے بڑی اور اور خوبصورت نسل سے تعلق رکھتا ہے۔

خوش قسمتی سے اس کی تمام چھوٹی بڑی ہڈیاں ملیں اور جب انہیں جوڑا گیا تو ڈائنوسار کی جسامت 30 فٹ تک جاپہنچی۔ اس طرح یہ ایک نایاب دریافت بھی ہے۔ ان کی طویل گردن اور چمچہ نما سر ہوتا تھا اور یہ درختوں کے پتے توڑ کر گزارا کیا کرتے تھے۔ واضح رہے کہ ٹائٹانوسارس 15 کروڑ سال قبل نمودار ہوئے اور اب سے ساڑھے چھ کروڑ سال قبل تمام ڈائنوسار کی طرح صفحہ ہستی سے مٹ گئے تھے ۔