وزیراعظم عمران خان کی کراچی میں حروں کے روحانی پیشوا پیرپگارا سے ان کی رہائش گاہ کنگری ہاوس پر ملاقات ہوئی ہے۔

تفصیلات کے مطابق وزیراعظم عمران خان سخت سیکیورٹی میں کنگری ہاوس پہنچے جہاں پیرپگارا نے ان کا استقبال کیا۔

وزیراعظم نے پیرپگارا کے ساتھ جی ڈی اے کی قیادت سے بھی ملاقات کی جس پر ذرائع کا کہنا ہے کہ جی ڈی اے نے وزیراعظم کو اپنے مسائل اور مطالبات سے بھی آگاہ کیا۔

ترجمان وزیراعظم ہاؤس کے اعلامیے کے مطابق  ملاقات میں جی ڈی اے رہنماؤں نے وزیر اعظم کی قیادت پر مکمل اعتماد کا اظہار کیا اور ان کو اپنے تعاون کی یقین دہانی کرائی۔

وزیراعظم سے وزیراعلیٰ کی ملاقات، آئی جی سندھ کی تبدیلی پر اتفاق

خیال رہے کہ گرینڈ ڈیمو کریٹک الائنس کئی جماعتوں پر مشتمل اتحاد ہے جس میں مسلم لیگ فکشنل، نیشنل پیپلزپارٹی اور سندھ نیشنل فرنٹ سمیت دیگر شامل ہیں۔

حکمران جماعت پاکستان تحریک انصاف کی وفاق اور پنجاب میں اتحادی حکومت قائم ہے، وفاق میں حکمران اتحاد میں مسلم لیگ (ق)، گرینڈ ڈیمو کریٹک الائنس (جی ڈی اے)، متحدہ قومی موومنٹ (ایم کیو ایم) پاکستان اور بلوچستان نیشنل پارٹی (مینگل) شامل ہیں۔

گرینڈ ڈیموکریٹک الائنس کی قومی اسمبلی میں 3 نشستیں ہیں جبکہ ڈاکٹر فہمیدہ مرزا وفاقی کابینہ میں بھی شامل ہیں اور وہ وفاقی وزیر برائے بین الصوبائی رابطہ ہیں۔

واضح رہے کہ گزشتہ دنوں گرینڈ ڈیمو کریٹک الائنس نے حکومتی کی جانب سے وعدے پورے نہ کرنے پر تحفظات کا اظہارکیا تھا تاہم بعدازاں حکومت سے مذاکرات میں ان کے گلے شکوے دور کردیے تھے۔

جی ڈی اے کے رہنما  علی گوہر مہر، ایاز پلیجو، عرفان اللہ مروت اور دیگر پہلے ہی  کنگری ہائوس پہنچ گئے  تھے۔

اس سے قبلوزیراعظم عمران خان ایک زوزہ دورے پر کراچی پہنچ گئے ہیں جہاں گورنر سندھ عمران اسماعیل اور وزیراعلیٰ سندھ مراد علی شاہ نے وزیراعظم عمران خان کا استقبال کیا۔

وزیراعلیٰ سندھ مراد علی شاہ کی گورنر ہاؤس میں ملاقات ہوئی جس میں وزیراعظم نے آئی جی سندھ کلیم امام کو فوری تبدیل کرنے کا مطالبہ مان لیا ہے جبکہ گورنر سندھ عمران اسماعیل  نے  بھی آئی جی کو تبدیل کرنے کے مطالبے کی حمایت کی۔

ملاقات میں صوبے میں امن و امان کی صورتحال اور آئی جی کی تبدیلی سندھ کے معاملے پر بھی تبادلہ خیال کیا گیا، وزیراعلیٰ سندھ نے آئی جی کے حوالے سے تحفظات سے آگاہ کیا۔