صوبہ سندھ میں سکھر، روہٹری ریلوے قندھارہ پھاٹک پر مسافر کوچ کراچی سے راولپنڈی جانے والی پاکستان ایکسپریس ٹرین کی زد میں آگئی۔ حادثے میں 19 افراد جاں بحق، متعدد زخمی ہوگئے۔
،تفصیلات کے مطابق مسافر بس جاڑے واہ ریلوے پھاٹک کراس کررہی تھی کہ پاکستان ایکسپریس سے ٹکرا گئی حادثے میں زخمی اور جاں بحق ہونے والے افراد کو روہڑی اور سکھر اسپتال منتقل کیا گیا ہے۔
پولیس حکام کے مطابق مسافر بس کے ڈرائیور نے جلدی میں ریلوے لائن کو کراس کرنے کی کوشش کی تب یہ حادثہ پیش آیا، پاکستان ایکسپریس مسافر بس کو دور تک گھسیٹ کر لے گئی، مسافر چیخ و پکار کرتے رہے۔
کمشنر سکھر شفیق مہیسر نے حادثے میں 19 افراد کے جاں بحق ہونے کی تصدیق کرتے ہوئے بتایاکہ جاں بحق ہونے والوں میں بچے اور خواتین بھی شامل ہیں۔
پولیس حکام کے مطابق جائے وقوعہ پر امدادی کارروائیاں شروع کردی گئی ہیں، جاں بحق اور زخمی ہونے والے افراد کو اسپتال منتقل کیا جا رہا ہے۔
حادثے کے مقام ہر امدادی کارروائیوں میں حصہ لینے کے لیے پاک فوج کے جوان موقع پر پہنچ گئے ہیں۔
وزیراعلیٰ سندھ سید مراد علی شاہ کا ٹرین حادثہ پر اظہار افسوس
وزیراعلیٰ سندھ سید مراد علی شاہ کا قندھارہ خیرپور میں ٹرین حادثہ پر گہرے دکھ کا اظہار کیا ہے، وزیراعلیٰ سندھ نے کمشنر سکھر کو حادثہ کی جگہ امدادی ٹیموں کو روانہ کرنے کی ہدایت کردی۔
وزیراعلیٰ سندھ نے خیرپور کی تمام اسپتالوں میں ایمرجنسی ڈکلیئر کرنے کی ہدایت بھی کردی۔ وزیراعلیٰ سندھ نے اعلان کیا کہ ادویات اور خون کا بندوبست اور زخمیوں کی جان بچانے کیلئے تمام اقدامات کئے جائیں۔
چیف سیکریٹری سندھ سید ممتاز علی شاہ کا روہڑی میں ٹرین بس حادثے کا نوٹس
چیف سیکریٹری سندھ سید ممتاز علی شاہ نے کہا کہ اس خوفناک واقعہ میں زخمی ہونے والوں کو جلد طبی امداد دی جائے۔ سکھر کے اسپتالوں میں ایمرجنسی نافذ کی جائے۔ اور ڈاکٹروں اور پیرامیڈیکل اسٹاف کی ڈیوٹی کو یقینی بنایا جائے۔
روہٹری حادثہ ، وزیر ریلوے شیخ رشید احمد کا اظہار افسوس
وزیر ریلوے شیخ رشید احمد نے روہڑی حادثے میں قیمتی جانوں کے ضائع ہونے پر افسوس کا اظہار کیا ہے۔
حادثہ ان مینڈ لیول کراسنگ پر پیش آیا۔ ٹرین حادثہ بظاہر بس ڈرائیور کی لاپروائی کی وجہ سے پیش آیا۔
حادثے میں ٹرین انجن کو نقصان پہنچا ہے، اور اسسٹنٹ ڈرائیور زخمی ہوا ہے ۔ ٹرین میں موجود تمام مسافر محفوظ رہےہیں۔
شیخ رشید احمد کا مزید کہنا تھا کہ پاکستان ریلوے کے 2470 ان مینڈ لیول کراسنگ ہیں جن کو مینڈ کرنے کے لیے پاکستان ریلوے نے کئی بار صوبائی حکومتوں کو خط لکھے ہیں۔
ڈرائیوروں اور راہگیروں سے ٹریک احتیاط سے عبور کرنے کی درخواست ہے۔ حادثے کی انکوائری فیڈرل گورنمنٹ انسپیکٹر آف ریلوے کریں گے۔
خیال رہے کہ گزشتہ ماہ 26 جنوری کو سندھ کے شہر خیرپور میں واری گوٹھ کے مقام پر برنس ایکسپریس کی 6 بوگیاں ٹریک سے اترگئی تھیں۔ ٹرین کے پٹری سے اترنے کے حادثے کے باعث 500 میٹر تک ٹریک کو نقصان پہنچا تھا۔
واضح رہے گزشتہ برس حیدرآباد میں مسافر ٹرین اورمال گاڑی کے درمیان تصادم کے باعث 3 افراد جاں بحق جبکہ متعدد زخمی ہوگئے تھے۔
اور اس سے قبل اکتوبر میں صوبہ پنجاب کے شہر لیاقت پور کے قریب تیز گام ٹرین کی 3 بوگیوں میں آگ لگ گئی تھی جس کے نتیجے میں 74 افراد جاں بحق ہوگئے تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News