ڈیجٹیل پاکستان وژن کی سربراہ تانیہ ایدروس کو وزیراعظم عمران خان کی معاون خصوصی بنا دیا گیا۔

تانیہ ایدرس کو معاون خصوصی برائے ڈیجیٹل پاکستان پروگرام تعینات کیا گیا ہے جن کی تعیناتی کا کابینہ ڈویژن نے نوٹیفکیشن بھی جاری کردیا ہے۔

تانیہ ایدرس سنگاپور میں واقع گوگل کے علاقائی ہیڈ آفس میں اہم پوزیشن پر فائز تھیں لیکن وہ اپنی پرکشش نوکری چھوڑ کر پاکستان آئیں تھیں۔

خیال رہے کہ انہیں گزشتہ سال دسمبر میں ڈیجیٹل پاکستان وژن پروگرام کا ہیڈ بنایا گیا تھا اور اب وہ معاون خصوصی ہوں گی۔

تانیہ ایدروس کون ہیں؟

ڈیجیٹل پاکستان ویژن کی سربراہی کیلئے دنیا کے سب سے مشہور ڈیجیٹل پلیٹ فارم گوگل کیلئے خدمات سر انجام دینے والی تانیہ ادریس کی خدمات حاصل کی گئی ہیں۔ تانیہ ادریس 20 سال پہلے پاکستان سے بیرون ملک چلی گئیں تھیں۔

انہوں نے امریکا کی برانڈیز یونیورسٹی سے بائیولوجی اور اکنامکس میں بی ایس کی ڈگری حاصل کی۔ اس کے بعد میساچوسٹس انسٹیٹیوٹ آف ٹیکنالوجی سے ایم بی اے مکمل کیا، پھر اس کے بعد انہوں نے کلک ڈائیگنوسٹک کے نام سے ایک سٹارٹ اپ کی بنیاد رکھی اور پھر اس کی ڈائریکٹر کے طور پر بھی کام کیا۔
بعد ازاں گوگل کی جنوبی ایشیا کی کنٹری مینیجر کے طور پر 2008 سے 2016 تک خدمات سر انجام دیتی رہیں، اس کے بعد انہیں گوگل کی پراڈکٹ “پیمنٹ فار نیکسٹ بلین یوزر پروگرام کی ڈائریکٹر بنا دیا گیا۔
تاہم اب تانیہ ادریس نے گوگل سے لی جانے والی تنخواہ اور مراعات کو چھوڑ کر، جو یقیناً لاکھوں میں ہوں گی، پاکستان کے اس اہم ڈیجیٹل منصوبے کی سربراہی سنبھال لی ہے۔