وزیر خارجہ مخدوم شاہ محمود قریشی کا ملائشین ہم منصب حشام الدین حسین سے ٹیلی فونک رابطہ ہوا جس میں کرونا عالمی وبائی چیلنج اور اس سے نمٹنے کیلئے کی جانے والی کاوشوں پر تبادلہ ء خیال کیا گیا جبکہ دونوں وزرائے خارجہ کا موجودہ عالمی وبائی صورت حال سمیت اہم امور پر مشاورت جاری رکھنے کا فیصلہ  بھی کیا ۔

وزیر خارجہ مخدوم شاہ محمود قریشی نے وزارت خارجہ کا منصب سنبھالنے پر حشام الدین حسین کو مبارکباد دی جبکہ اس عالمی وبا کے پھیلاؤ کی وجہ سے ملایشیا میں ہونیوالے جانی نقصان پر گہرے دکھ اور افسوس کا اظہار کیا۔

وزیر خارجہ مخدوم شاہ محمود قریشی نے اس عالمی وبا کے پھیلاؤ کو روکنے اور اس عالمی چیلنج سے نمٹنے کے حوالے سے ملایشین حکومت کی طرف کیے گئے بروقت اقدامات کو سراہا جبکہ اس مشکل گھڑی میں، ملائشیا میں مقیم پاکستانیوں کا خصوصی خیال رکھنے پر ملایشیا کے وزیر خارجہ کا شکریہ ادا کیا

وزیر خارجہ نے موجودہ وبائی تناظر میں ، کمزور معیشتوں کو درپیش شدید مشکلات کے پیش نظر، وزیر اعظم عمران خان کی طرف سے ترقی پذیر ممالک کے واجب الادا قرضوں کی ری اسٹرکچرنگ کی تجویز  اور س وبا کے پھیلاؤ کو روکنے کیلئے پاکستان کی طرف سے کی جانے والی کاوشوں سے اپنے ملائشین ہم منصب کو آگاہ کیا۔

عبدالحفیظ شیخ کی جاپان کے سفیر سے ملاقات، کورونا وباء کی صورتحال پر تبادلہ خیال

اس موقع پر شاہ محمود قریشی نے کہا کہ ترقی پذیر ممالک کے قرضوں کی ری اسٹرکچرنگ سے انہیں اپنے وسائل، اس عالمی وبائی چیلنج سے نمٹنے اور قیمتی انسانی جانوں کو بچانے کیلئے استعمال کرنے کا موقع میسر آئے گا  جس پر ملائشین وزیر خارجہ نے قرضوں کی ری سٹرکچرنگ سے متعلق، وزیر اعظم عمران خان کی تجویز کا خیر مقدم کرتے ہوئے اس معاملے کو جی 20 ممالک کے ساتھ اٹھانے کا عندیہ دیا۔

وزیر خارجہ نے اپنے ہم منصب کو مقبوضہ جموں و کشمیر میں جاری انسانی حقوق کی سنگین خلاف ورزیوں سے آگاہ کرتے ہوئے کہا کہ نہتے کشمیری، گذشتہ 8 ماہ سے بدترین کرفیو کا سامنا کر رہے ہیں

شاہ محمود قریشی  نے یہ بھی کہا کہ ایک  طرف جب دنیا اپنی توجہ، اس عالمی وبائی چیلنج کی طرف مرکوز کیے ہوئے ہے بھارت ڈومیسائل سے متعلقہ قواعد و ضوابط کو تبدیل کر کے مقبوضہ کشمیر میں آبادیاتی تناسب کو تبدیل کرنے کے درپے ہے جو نہ صرف بین الاقوامی قوانین کی خلاف ورزی ہے بلکہ اقوام متحدہ سیکورٹی کونسل کی قراردادوں کے بھی منافی ہے ۔

وزیر خارجہ مخدوم شاہ محمود قریشی نے مزید کہا کہ 80 لاکھ نہتے کشمیریوں کو بھارتی استبداد سے بچانے کیلئے عالمی برادری کو اپنا موثر کردار ادا کرنا ہوگا ۔