کراچی میں نمائش سے ٹاور تک ٹرام چلانے کے لیے ترکی کی حکومت تعاون کرنے کے لیے تیار ہے۔

تفصیلات کے مطابق ترکی کے قونصل جنرل تولگا یوک کی ایڈمنسٹریٹر کراچی افتخار شالوانی سے ان کے دفتر میں ملاقات ہوئی ہے، کمرشل اتاشی ایوب یلڈرم بھی قونصل جنرل کے ہمراہ تھے۔

ملاقات میں قونصل جنرل ترکی کا کہنا تھا کہ ترکی کی حکومت ایم اے جناح روڈ اور آئی آئی چندریگر روڈ پر ٹرام چلانے میں حکومت کی مدد کرے گی۔

قونصل جنرل ترکی نے بتایا ہے کہ آئی آئی چندریگر روڈ پر شاہین کمپلیکس سے ٹاور تک ٹرام سروس کے لیے بھی ترکی کی حکومت تعاون کرے گی۔

اس کے علاوہ انہوں نے بتایا ہے کہ کراچی کی لائبریریوں کی بہتری اور انہیں ماڈرن لائبریریاں بنانے کے لیے بھی ترکی کی حکومت بھرپور تعاون کرے گی۔

قونصل جنرل ترکی کی جانب سے ایڈمنسٹریٹر کراچی افتخار شالوانی کو تعیناتی پر مبارک باد دی اور نیک خواہشات کا اظہار کیا گیا ہے۔

دوسری جانب ایڈمنسٹریٹر کراچی افتخار شالوانی نے کہا ہے کہ ترکی ہمارا برادر اسلامی ملک ہے اور پاکستان سے اس کے تعلقات مثالی ہیں، ٹرام سروس اور لائبریریوں کو بہتر کرنے کے لیے تعاون پر میں ترکی کی حکومت کا خصوصی شکریہ بھی ادا کیا گیا۔

انہوں نے کہا ہے کہ کراچی میں ٹرام سروس چلنے سے کراچی کی تاریخی حیثیت بحال ہوگی ۔