کلبھوشن یادیو کو قانونی معاونت فراہم کرنے کے کیس کی سماعت 9 نومبر تک ملتوی کردی گئی۔
تفصیلات کے مطابق چیف جسٹس اسلام آباد ہائیکورٹ جسٹس اطہر من اللہ کی سربراہی میں لارجر بینچ نے کلبھوشن یادیو کو قانونی معاونت فراہم کرنے کے کیس کی سماعت کی۔
عدالت نے کلبھوشن یادیو کو قانونی معاونت فراہم کرنے کے کیس میں آج کی سماعت کا تحریری حکمنامہ جاری کردیا ۔
عدالت نے تحریری حکمنانے میں لکھا کہ اٹارنی جنرل کے مطابق پاکستان اور بھارت کے درمیان کلبھوشن کیس پر خط و کتابت ہوئی، بادی النظر میں لگتا ہے کہ بھارت کلبھوشن کیس میں عدالتی کارروائی سے ہچکچا رہا ہے۔
عدالت نے مزید لکھا کہ عدالت کو بتایا گیا کہ کلبھوشن یادیو کے موقف میں بھی تبدیلی نہیں آئی۔بھارت عدالت کی طرف سے بار بار مواقع دینے کے باوجود رجوع نہیں کررہا۔
حکمنامے میں لکھا گیا کہ عدالت آگاہ ہے کہ کیس میں کمانڈر کلبھوشن یادیو کے حقوق کا معاملہ ہے۔کلبھوشن کیس میں عالمی عدالت انصاف پر عمل درآمد پاکستان کی ذمہ داری ہے۔
عدالت نے مزید لکھا کہ کلبھوشن کے حق زندگی اور فئیر ٹرائل کا معاملہ بہت اہم اور احتیاط کا ہے۔ان حالات میں اٹارنی جنرل انصاف کے تقاضے پورے کرنے کے لیے رہنمائی کریں۔
حکمنامے میں لکھا گیا کہ اگر بھارت ہچکچاہٹ جاری رکھتا ہے تو عالمی عدالت انصاف کے فیصلے پر کیسے کاروائی آگے بڑھائی جائے۔ عالمی عدالت انصاف کے فیصلے پر من و عن عملدرآمد کے لیے عدالت کی معاونت کی جائے۔
اسلام آباد ہائیکورٹ نے اٹارنی جنرل اور عدالتی معاون حامد خان سے معاونت طلب کرتے ہوئے کیس کی مزید سماعت 9 نومبر تک ملتوی کردی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News