پنجاب کا دل کرپشن کرنے والوں کے ساتھ کبھی نہیں دھڑک سکتا


شبین رضاویب ایڈیٹر

05th December, 2020
Ab Pata Chala with Usama Ghazi Complete Episode | 13th January 2021
Square ad 300 x 250

صوبائی وزیر  فیاض الحسن چوہان نے کہا ہے کہ لاہور جلسہ پی ڈی ایم کے ملک دشمن بیانیے کے تابوت میں آخری کیل ثابت ہو گا۔

تفصیلات کے مطابق وزیر اطلاعات پنجاب کا کہنا تھا کہ پی ڈی ایم کو اب تک چاروں صوبوں سے ہزیمت کے سوا کچھ نہیں ملا، پنجاب کا دل کرپشن اور خاندانی سیاست کرنے والوں کے ساتھ کبھی نہیں دھڑک سکتا۔

انہوں نے کہا کہ لاہور میں بھی پاکستان ڈیمولشنگ موومنٹ کا پھیکا چورن نہیں بکنے والا، کرپشن کے کرداروں کو چاہیے احتساب کا سامنا خشوع و خضوع سے باجماعت کریں۔

دوسری جانب مسلم لیگ ن کے رہنما رانا ثنا اللہ نے کہا ہے کہ مریم نواز ہی پارٹی کو لیڈ کر رہی ہیں اور ہم سب ان کے ساتھ ہیں۔

مسلم لیگی رہنما نے کہا ہے کہ  یہ ایسا کورونا وائرس ہے جو جلسوں سے پہلے آتا ہے، بعد میں بھاگ جاتا ہے، ہم بنی گالہ میں چھپے کورونا وائرس کو بھگا کر دم لیں گے۔

 لاہورکی انسدادِ منشیات کی خصوصی عدالت میں منشیات اسمگلنگ کیس کی سماعت کے سلسلے میں مسلم لیگ ن کے رہنما رانا ثناء اللہ پیش ہو ئے اور میڈیا سے گفتگو کرتے ہوئے ان کا کہنا تھا کہ یہ لوگ ارشد ملک جیسے جج تیار کرتے ہیں، اسپیشل کورٹس سے کسی کو انصاف نہیں مل سکتا،ارشد ملک صاحب فوت ہو چکے ہیں، اب ان کے حوالے سے بات نہیں کرنی چاہیئے۔

صدر ن لیگ پنجاب نے کہا کہ میرا تو قومی اسمبلی کا اکاؤنٹ تک منجمد کر دیا گیا ہے، 13 دسمبر کو ان شاء اللہ لاہور میں جلسہ ضرور ہوگا،انھوں نے  حکمرانوں سے مخاطب ہوتے ہوئے کہا کہ آپ کورونا وائرس سمیت جہاں مرضی چھپیں، ہم آپ کوجیل بھیج کر ہی دم لیں گے۔

رانا ثنا اللہ کا کہنا تھا کہ میرے خلاف بیان دلوانے کے لیے کئی لوگوں کو پکڑا گیا، انہوں نے کہا کہ رانا ثناء اللہ کے خلاف کوئی ثبوت نہیں ہیں۔

انہوں نے کہا کہ ان تمام لوگوں نے پوچھ گچھ میں میرے حق میں بات کی، یہ لوگ پوری دنیا میں میری ایک روپے مالیت کی جائیداد منظرِعام پر نہیں لا سکے۔

مسلم لیگی رہنما نے مزید کہا کہ نواز شریف نے اپوزیشن جماعتوں کی اے پی سی میں اجتماعی استعفوں کی تجویز دی ہے، پی ڈی ایم فیصلہ کرے تو مسلم لیگ ن استعفے دینے کو تیار ہے۔

رانا ثناء اللہ کا یہ بھی کہنا تھا کہ نواز شریف بہت بہتر انداز میں لندن سے قیادت کر رہے ہیں، ریلیوں، استعفوں سمیت کسی معاملے پر مسلم لیگ ن میں کوئی اختلاف نہیں۔