وزیراعظم عمران خان نے اپنے ایک انٹرویو میں کہا ہے کہ امریکہ افغان مسئلے کا حل نکالنے میں ناکام ہوتا جارہا ہے جبکہ سیاسی تصفیہ ہی افغان مسئلے کا حل ہے۔

تفصیلات کے مطابق وزیراعظم عمران خان نے امریکی میڈیا کو انٹرویو دیتے ہوئے کہا ہے کہ طالبان افغانستان میں خود کو فاتح سمجھ رہے ہیں جس کی وجہ سے اب افغانستان میں خانہ جنگی کا خطرہ ہے۔

وزیراعظم عمران خان نے امریکی میڈیا کو بتایا کہ اگر افغانستان میں سول وار ہوتی ہے تو بہت بھیانک صورتحال ہوگی جس کی وجہ سے پاکستان میں بھی خانہ جنگی کاخدشہ ہے۔

وزیراعظم کا کہنا تھا کہ پاکستان نے دہشتگردی کے خلاف جنگ میں 70 ہزار سے زائد قربانیاں دیں جبکہ دہشت گردی کے خلاف جنگ میں پاکستانی معیشت کو 150 ارب ڈالر کا نقصان بھی ہوا ہے۔

وزیراعظم کا مزید کہنا تھا کہ ہماری جانب سے تو ایک عرصے سے کہا جارہا ہے کہ ہم عرصے سے کہہ رہے ہیں مہاجرین کو واپس بلایا جائے کیونکہ پاکستانی معشیت مزید افغان مہاجرین کا بوجھ نہیں اٹھاسکتی ہے۔

وزیراعظم نے اپنے انٹرویو میں بتایا ہے کہ افغانستان کا پاکستان پر جہادی بھیجنے کا الزام احمقانہ ہے اور اسکے علاوہ لگائے جانے تمام الزامات کے اب تک ثبوت کیوں نہیں پیش کیئے گئے ہیں؟

وزیراعظم عمران خان کا کہنا تھا کہ طالبان خود کو فاتح سمجھ رہے ہیں اور اب وہ چاہتے ہیں اشرف غنی کی حکومت کا خاتمہ ہوجائے تاہم اشرف غنی کوانتخابات کیلئے تاخیر کرنی چاہییے تھی۔

وزیراعظم عمران خان نے یہ بھی کہا ہے کہ پاکستان اس سے زیادہ کوئی مدد فراہم نہیں کرسکتا کہ افغانستان کے سیاسی حل کیلئے دباؤ ڈالیں کیونکہ ہم افغانستان میں امن چاہتےہیں لیکن کسی محاذ آرائی کا حصہ نہیں بننا چاہتے ہیں۔