قصور میں بچوں سے زیادتی کے واقعات اب تک نہ تھم سکے ہیں۔

تفصیلات کے مطابق قصور تھانہ بی ڈویژن کی حدود میں زبردستی کمسن بچوں سے زیادتی کا ایک ہفتے میں دوسرا واقعہ سامنے آیا ہے۔

ذرائع کا کہنا ہے کہ قصور میں 3 دن پہلے بھی ایک واقعہ ہوا تھا جہاں تین سفاک ملزمان نے 13 سالہ گونگے بہرے لڑکے کو اپنی حوس کا نشانہ بنا ڈالا تھا۔

ذرائع کے مطابق آج پھر قصور میں زیادتی کا معاملہ سامنے آیا ہے جہاں تھانہ بی ڈویژن کے علاقے بھسر پورہ میں کمسن بچی سے اوباش ملزم نے زبردستی جنسی زیادتی کی ہے۔

پولیس ذرائع نے کہا کہ ملزم عمران عرف راجہ نے 9 سالہ بچی کو ورغلاء پھسلاء کر کمرے میں لے جا کر زیادتی اور ہوس کا نشانہ بنایا ہے۔

ذرائع کے مطابق ننھی شہزادی برف لینے کے لیے گھر سے نکلی تھی جب دیر تک واپس گھر نہ آئی تو گھر والوں نے ڈھونڈنا  شروع کر دیا تو ننھی بچی روتی ہوئی  گلی سے مل گئی۔

ذرائع کا کہنا ہے کہ بچی نے بتایا کہ سفاک درندے نے اسے زبردستی اپنی ہوس کا نشانہ بنایا ہے۔

ذرائع کا کہنا ہے کہ ڈی ایس پی سٹی یعقوب اعوان نے پولیس تھانہ بی ڈویژن کے ہمراہ گھنٹے کے اندر بچی کی نشاندہی پر ملزم کو گرفتار کر لیا ہے۔

ڈی ایس پی یعقوب اعوان نے کہا کہ ملزم پہلے بھی قتل اور دیگر مقدمات میں ریکارڈ یافتہ پایا گیا ہے۔

پولیس کا کہنا ہے کہ ملزم سے ابتدائی تحقیقات جاری ہیں اور اس کا مقدمہ درج کر لیا گیا ہے۔