وفاقی وزیر اطلاعات ونشریات فواد چوہدری کا کہنا ہےکہ ہم کسی اور سیارے پر نہیں رہتے، دنیا میں تیل اورگیس کی قیمت اوپر جائے گی تو پاکستان میں بھی فرق پڑے گا۔
تفصیلات کے مطابق وفاقی وزیراطلاعات ونشریات فواد چوہدری نے سماجی رابطے کی ویب سائٹ ٹوئٹر پر جاری اپنے پیغام میں کہا ہے کہ تیل کی قیمت میں اضافے کو لےکر ایسے پروپیگنڈا ہو رہا ہے جیسے ہم دنیا سے کسی علیحدہ سیارے پرہیں، سارا ملک سبسڈی پر نہیں چل سکتا، آج قیمتیں اوپر ہیں کل کم ہو جائینگی تو یہاں بھی کم ہو جائیں گی۔
تیل کی قیمت میں اضافے کو لیکر ایسے پروپیگنڈا ہو رہا ہے جیسے ہم کوئ دنیا سے کسی علیحدہ سیارے پر ہیں اگر دنیا میں تیل، گیس اوپر جائیگا پاکستان میں بھی اوپر جائیگا، سارا ملک سبسڈی پر نہیں چل سکتا آج قیمتیں اوپر ہیں کل کم ہو جائینگی تو یہاں بھی کم ہو جائیں گی،
— Ch Fawad Hussain (@fawadchaudhry) October 17, 2021
وفاقی وزیر فواد چوہدری نے اپنی ٹوئٹ میں مزید کہاکہ معاشی مشکلات عارضی ہیں، انڈسٹری ، زراعت اور تعمیرات کے شعبے تاریخی منافع کما رہے ہیں، تنخواہ دار طبقے کی مشکلات ہیں۔ پرائیویٹ سیکٹر اپنے ورکرز کی تنخواہوں میں اضافہ کرے، آمدنی اور روزگار میں اضافہ مہنگائی کاتوڑہے۔
دوسری جانب مسلم لیگ ن کے صدر شہبا ز شریف کا کہنا ہےکہ عمران نیازی ‘آئی ایم ایف نہیں جاؤں گا، خود کشی کر لوں گا’ کے نعرے لگاتے تھے۔
پاکستان مسلم لیگ (ن) کے صدر اور قائد حزب اختلاف شہباز شریف نے جاری کردہ اپنے بیان میں کہاکہ آئی ایم ایف سے مذاکرات کی ناکامی کے بعد حکومت قیمتوں میں اضافہ واپس لے، حکومت نے مہنگائی پہلے کردی، آئی ایم ایف سے مذاکرات بھی ناکام ہوگئے۔
ان کا کہنا ہےکہ آئی ایم ایف کی تمام شرائط پہلے مان لیں پھر بھی مذاکرات ناکام ہوگئے، یہ ہے حکومت کی حکمت عملی؟ تین سال آئی ایم ایف کی اندھی تابعداری اور عوام کو مہنگائی سے لہولہان کردیا اور نتیجہ صفر؟
مسلم لیگ ن کے صدر نے کہاکہ وزیر خزانہ کو سینیٹر بنوانے میں عمران نیازی نے جتنی دلچسپی لی، شوکت ترین نے بھی اتنی ہی دلچسپی سے مذاکرات کئے،حکومت نے عوام کو دھوکہ دیا اور آئی ایم ایف کو بھی چکر دیا، تین سال سے عوام کا معاشی قتل جاری ہے۔
قومی اسمبلی میں اپوزیشن لیڈر شہباز شریف نے کہاکہ بجلی گیس پیٹرول آٹا اور چینی کی قیمت اور آئی ایم ایف سے ۔ مذاکرات کیوں ہوئے؟ قوم کو بتایا جائے۔
انہوں نے اپنے بیان میں مزید کہاکہ نواز شریف کی قیادت میں پاکستان مسلم لیگ (ن) نے 2015 میں آئی ایم ایف پروگرام مکمل کیا تھا، ان پر عمران نیازی تنقید کیا کرتے تھے۔
اس سے قبل مسلم لیگ ن کے صدر اور قومی اسمبلی میں اپوزیشن لیڈر شہباز شریف نے سماجی رابطے کی ویب سائٹ ٹوئٹر پر جاری پیغام میں حکومت پر شدید تنقید کرتے ہوئے کہاکہ حکومت شہریوں کےدرمیان رشتے کوکمزورکررہی ہے، حکمران ٹولے کی عوام دشمن اوربےحس پالیسیوں کےمضمرات پریشان کن ہیں۔
مسلم لیگ ن کے صدر شہباز شریف کا مزید کہنا تھا کہ پی ٹی آئی حکومت اپنی نااہلی سے مایوسی و انتشار پھیلا رہی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News