وزیر خارجہ شاہ محمود قریشی نے کہا ہے کہ سیالکوٹ واقعے سے پاکستان کے سری لنکا کے ساتھ تعلقات متاثر نہیں ہوں گے۔

لاہور میں پریس کانفرنس کے دوران شاہ محمود قریشی نے کہا کہ افغانستان کےحالات سے متعلق ہمارے تحفظات ہیں، دنیا کو افغانستان کےحالات سمجھنے کی ضرورت ہے، افغانستان کے اثاثے منجمد رہے تو معاشی بحران آسکتا ہے، وہاں 2 کروڑ سے زائد افراد خورا ک کی قلت کا شکار ہوسکتے ہیں، بروقت امدادنہ کی گئی تووہاں انسانی المیہ جنم لے سکتا ہے، ان حالات میں افغانستان کو اکیلا چھوڑنا ایک تاریخی غلطی ہو گی.

شاہ محمود قریشی نے کہا کہ پاکستان 19 دسمبر کو او آئی سی کی میزبانی کرنے جارہا ہے، اس غیر معمولی اجلاس کا مقصد افغانستان کی صورت حال پر غور کرنا ہے، او آئی سی کا اجلاس 41 سال بعد ہورہا ہے، پاکستان نے امریکا ، چین اور برطانیہ کو بھی دعوت دی ہے جب کہ ورلڈ بینک کے نمائندوں کو بھی دعوت دے رہے ہیں، ہم افغانستان کے ایک اعلی سطحی وفد کو بھی دعوت دیں گے کہ وہ بین الاقوامی وفد کو اصل صورتحال سے آگاہ کریں۔

اس خبر کو بھی پڑھیے: افغانستان میں ایک ملین بچوں کو موت کا خطرہ

وفاقی وزیر نے کہا کہ بھارت نے 15 اگست کو طالبان کے برسراقتدار آنے کے بعد پاکستان کے خلاف بھر پور مہم چلائی، اس کی کوشش تھی کہ وہ پاکستان کو اس معاملے میں الجھائے لیکن پاکستان نے سفارتی محاذ پر بھارت کی اس مہم کو شکست دی، ہم نے یہ بھی کوشش کی ہے کہ ہم اپنے سفارتی تعلقات بڑھائیں، ہم افغانستان کے 6 ہمسایہ ملکوں کا ایک پلیٹ فارم بنانے میں کامیاب ہوئے، پاکستان کو اپنے افعان بھائیوں کے لئے راستہ دینے میں کوئی ہچکچاہٹ نہیں، ہم نے بھارت کو افغانستان کے لئے گندم دینے میں بھی سہولت کاری دینے کا عندیہ دیا ہے۔

شاہ محمود قریشی نے کہا سیالکوٹ واقعے سے سب کو دکھ ہوا، یہ باعث ندامت اور افسوسناک ہے، وزیراعظم خود سیالکوٹ واقعے کی تحقیقات کی نگرانی کررہے ہیں، سری لنکن حکام کےساتھ مسلسل رابطےمیں ہیں، واقعے سے سری لنکا کے ہائی کمشنر کو لمحہ با لمحہ باخبر رکھا ہے، اس حوالے سے سری لنکن ہم منصب سے بھی رابطہ ہوا ہے، ہم نے سری لنکن منیجر کے اہل خانہ سے بھی رابطہ کیا ہے، ہم کیس کو ان کی خواہش کے مطابق آگے بڑھیں گے، سری لنکا نے پاکستان کے مؤقف کو سراہا ہے،واقعے سے ہمارے تعلقات متاثر نہیں ہوں گے۔

گورنر پنجاب چوہدری سرور کی جانب سے تنقیدی بیان سے متعلق پوچطھے گئے سوال پر شاہ محمود قریشی نے کہا کہ چوہدری سرور کہیں نہیں جا رہے اگر وہ ایسے بیان نہ دیں تو پھر ٹاک شوز میں کیا کریں گے۔