ترجمان دفتر خارجہ نے کہا ہے کہ وزیر اعظم روسی صدر کی دعوت پر روس جائیں گے۔
ترجمان دفترخارجہ عاصم افتخار احمد نے اپنے ایک بیان میں کہا کہ وزیر اعظم عمران خان کے دورہ روس کا شیڈول جاری کردیا گیا ہے، وزیر اعظم روسی صدر کی دعوت پر 23، 24 فروری کو روس کا دورہ کرینگے۔
انہوں نے کہا کہ وزیر اعظم کے ہمراہ وفاقی کابینہ اراکین سمیت اعلیٰ سطح کا وفد روس جائیگا۔
عاصم افتخار احمد کا کہنا تھا کہ پاکستان اور روس کے درمیان باہمی وقار اور اعتماد پر مبنی دو طرفہ تعلقات موجود ہیں، وزیر اعظم کے دورہ روس سے دونوں ملکوں کے تعلقات کو فروغ دینے میں مدد ملے گی۔
ترجمان دفترخارجہ عاصم افتخار احمد کا مزید کہنا تھا کہ دو طرفہ سمٹ میں دونوں ملکوں کے رہنما باہمی اور علاقائی تعاون پر تبادلہ خیال کرینگے جبکہ افغانستان کی صورت حال ، اسلاموفوبیا سمیت اہم عالمی و علاقائی امور پر تبادلہ خیال کیا جائیگا۔
واضح رہے اس سے قبل وزیراعظم عمران خان کے دورہ روس کی تفصیلات سامنے آگئیں۔
وزیرعظم 23 فروری کی شام ماسکو پہنچیں گے، روس کے نائب وزیر خارجہ وزیراعظم عمران خان کا استقبال کریں گے۔
وزیراعظم عمران خان کو ماسکو میں گارڈ آف آنر پیش کیا جائے گا۔
وزیراعظم 24 فروری کو روسی صدر سے ملاقات کریں گے۔
وزیراعظم 24 فروری کی صبح دوسری جنگ عظیم میں ہلاک فوجیوں کی قبرپرپھول رکھیں گے۔
وزیراعظم دوپہر ایک بجے روس کے صدر ولادمیر پیوٹن سے ملاقات کریں گے۔ ملاقات میں پاک روس تعلقات پر تبادلہ خیال ہو گا۔
وزیراعظم دورہ روس کے دوران ماسکو میں ٹی وی چینل کو انٹرویو دیں گے۔ پاکستانی میڈیا سے بھی گفتگو کریں گے۔
وزیراعظم سے روس کے نائب وزیراعظم کی ملاقات بھی ہو گی جس میں پاکستان اور روس کے درمیان توانائی امور پر تعاون کے لیے بات چیت ہو گی۔
دورے کے دوران وزیراعظم عمران خان سے روس اور پاکستان کی ممتاز کاروباری شخصیات بھی ملیں گی۔
وزیراعظم عمران خان ماسکو میں اسلامی سینٹر کا بھی دورہ کریں گے، روس کے مفتی اعظم کی ملاقات بھی شیڈول میں شامل ہے۔
وزیراعظم دورہ روس مکمل کرنے کے بعد 24 فروری کی رات پاکستان کے لیے واپس روانہ ہوں گے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News