آئندہ 12 گھنٹوں کے دوران سندھ، بلوچستان، پنجاب، خیبرپختونخوا، کشمیر اور گلگت بلتستان میں گرج چمک کے ساتھ بارش کا امکان ہے۔

اس دوران سندھ، بلوچستان اور جنوبی پنجاب میں بھی موسلادھار بارش کا امکان ہے۔

اسکے علاوہ قلعہ سیف اللہ ،لورالائی ،بارکھان،کوہلو  سمیت بلوچستان کے  مختلف علاقوں  اور ڈیرہ غازی خان کے برساتی  نالوں میں طغیانی کا خطرہ ہے۔

دوسری جانب محکمہ موسمیات کی جانب سے کراچی، ٹھٹھہ، بدین، حیدرآباد، دادو میں بھی موسلادھار بارش کی پیشگوئی کی گئی ہے۔

محکمہ موسمیات کا کہنا ہے کہ کشمیر،خیبرپختونخوا کے پہاڑی علاقوں،گلیات ،  چلاس، دیامر، گلگت،ہنزہ، استور اورسکردومیں لینڈ سلائیڈنگ کا خدشہ موجود ہے۔

خیال رہے کہ ڈیرہ غازی خان اور راجن پور کے کوہ سلیمان رینج میں طوفانی بارشیں ہوئیں ہیں جبکہ رودکوہیوں میں طغیانی سے متعدد دیہات زیرآب آگئے ہیں۔

اسکے علاوہ ہزاروں ایکڑ رقبے پر فصلیں بھی متاثر ہوئیں ہیں جبکہ بھارت کی جانب سے پانی چھوڑے جانے کے بعد دریائے راوی میں بھی سیلاب کی وارننگ جاری کردی گئی ہے۔

دوسری جانب گوجرانوالہ، لاہور اور ملتان ڈویژن کے ندی نالوں میں طغیانی کا خدشہ ظاہر کردیا گیا ہے جس کے بعد تمام اضلاع کی انتظامیہ کو پیشگی انتظامات کیلئے احکامات جاری کردیئے گئے ہیں۔