مرحوم سینئر صحافی ارشد شریف کی اہلیہ جویریہ صدیق نے کہا ہے کہ ارشد شریف کی پوسٹ مارٹم رپورٹ اب تک ہمیں نہیں ملی۔

شہید ارشد شریف کی بیوہ جویریہ صدیق نے بول نیوز  سے گفتگو کرتے ہوئے کہا کہ ارشد شریف کیس کو میڈیا ٹرائل نہیں بنانا چاہیے، تصاویر میڈیا پر آنا مناسب نہیں۔

انہوں نے کہا کہ پوسٹ مارٹم رپورٹ اب تک ہمیں نہیں ملی، رپورٹ ہمیں دینے کے بجائے میڈیا پر لیک کرانا باعث تشویش ہے۔

‘معلوم نہیں حکومت رپورٹ چھپا کر کیا کرنا چاہتی ہے’

بیوہ ارشد شریف نے کہا کہ پوسٹ مارٹم رپورٹ تاحال ہمیں نہیں دی گئی، کینیا اور پاکستان کی رپورٹ کے بعد تبصرہ کیا جاسکتا ہے۔ اعلیٰ سطح جوڈیشل کمیشن یا اقوام متحدہ کا کمیشن تحقیقات کرے۔

جویریہ صدیق نے مزید کہا کہ معلوم نہیں حکومت رپورٹ چھپا کر کیا کرنا چاہتی ہے، حکومت کی طرف سے کسی نے مجھ سے رابطہ نہیں کیا۔

ارشد شریف کے قتل سے متعلق نئے اہم انکشافات سامنے آگئے

گزشتہ روز بول نیوز کے اینکر پرسن ارشد شریف کے قتل کے کیس میں نئے انکشافات سامنے آئے تھے۔

قتل سے پہلے بول نیوز کے اینکر پرسن ارشد شریف پر تین گھنٹے تشدد کیا گیا اور ان کے ناخن اتارے گئے جبکہ تشدد سے ان کے ہاتھ کی انگلیاں اور پسلیاں بھی ٹوٹ گئیں۔ گاڑی سے اتار کر انتہائی قریب سے گولیاں ماری گئیں، قتل منصوبہ بندی سے ہوا۔