لاہور: پاکستان تحریک انصاف (پی ٹی آئی) کے رہنما  فرخ حبیب نے کہا ہے کہ امپورٹڈ وزیراعظم سے معیشت چل رہی ہے نہ ملک۔

پی ٹی آئی رہنما فرخ حبیب نے زمان پارک میں میڈیا سے گفتگو کرتے ہوئے کہا کہ زخمی عمران خان کو پاکستان کی فکر ہے، عمران خان نے قاتلانہ حملے کے بعد ایک ذمہ دار لیڈر ہونے کا ثبوت پیش کیا۔

‘کل ملکی تاریخ کا ایک یادگار دن ہوگا’

انہوں نے کہا کہ عمران خان کل راولپنڈی پہنچنے کی تاریک کا اعلان کریں گے، لانگ مارچ کل روات پہنچے گا، عمران خان اہم اعلان کریں گے، کل ملکی تاریخ کا ایک یادگار دن ہوگا۔

فرخ حیب نے کہا کہ ملک کو فوری انتخابات کی طرف لے جانا چاہیے، عوام کو فیصلہ کرنا ہے کہ چوروں کے ساتھ کھڑا ہونا ہے یا نہیں، چوروں کا ٹولہ پاکستان میں صرف حکومت کرنے آتا ہے۔

‘ملک کو اس وقت سیاسی و معاشی بحران کا سامنا ہے’

پی ٹی آئی رہنما نے کہا کہ ملک میں مہنگائی کے 50 سالہ ریکارڈ ٹوٹ گئے ہیں، اس وقت بیرونی سرمایہ کاری نہ ہونے کے برابر ہے۔

انکا کہنا ہے کہ عمران خان کے دور میں مختلف ترقیاتی منصوبے پھل پھول رہے تھے، عمران خان کے دور حکومت میں ملک معاشی ترقی کی طرف بڑھ رہا تھا۔

فرخ حیب نے مزید کہا کہ امپورٹڈ حکومت کے وزیراعظم سے معیشت چل رہی ہے نہ ملک، ملک کو اس وقت سیاسی و معاشی بحران کا سامنا ہے۔

حقیقی آزادی مارچ کا دوسرا مرحلہ: عمران خان آج شرکاء سے خطاب کرینگے

پاکستان تحریک انصاف کا حقیقی آزادی مارچ دوسرے مرحلے کے 9 ویں روز  چکوال پہنچ چکا ہے۔

مرکزی سیکرٹری جنرل تحریک انصاف اسد عمر حقیقی آزادی مارچ قافلے کی قیادت کرینگے، حقیقی آزادی مارچ قافلے کا چکوال شہر میں 6 مقامات پر استقبال کیا جائے گا۔

مرکزی سیکرٹری جنرل اسد عمر کی قیادت میں قافلے کا صبح 11 بجے کلر کہار انٹرچینج پہنچنے پر رہنما تحریک انصاف پیر وقار استقبال کریں گے۔

دن 12بجے بلکسر پہنچنے پر حقیقی آزادی مارچ قافلے کا خیر مقدم ایم پی اے سردار آفتاب اکبر نے کیا،  قافلے کا دن 2 بجے دلہہ پہنچنے پر سابق ایم این اے سردار ذوالفقار دلہہ استقبال کیا۔

حقیقی آزادی مارچ کا قافلہ دن 2:30 بجے لطیفال پہنچے گا، تحریک انصاف کے رہنما سردار نجف استقبالیہ دیں گے۔

مرکزی سیکرٹری جنرل اسد عمر کی زیر قیادت قافلہ دن 3 بجےڈھڈیال پہنچے گا،ضلعی چئیرمین خورشید بیگ استقبال کریں گے۔

حقیقی آزادی مارچ قافلہ 3:30 بجے ہرل چوک پہنچے گا،وہاں تحریک انصاف رہنما راجہ طارق استقبالیہ دیں گے۔

یہ بھی پڑھیں: عدالت کا کراچی اور حیدرآباد میں فوری الیکشن کا شیڈول جاری کرنے کا حکم

ذرائع کے مطابق چکوال میں حقیقی آزادی مارچ کے حوالے سے عوامی اجتماع کا انعقاد کیا جائے گا، مرکزی سیکرٹری جنرل اسد عمر چکوال میں 4 بجے مارچ کے شرکاء سے مخاطب ہونگے۔

چکوال میں چئیرمین پی ٹی آئی اور سابق وزیراعظم عمران خان کا خطاب براہ راست بڑی اسکرین پر دکھانے کا اہتمام کیا جائے گا۔