صوبائی وزیر شرجیل انعام میمن نے ٹرانس کراچی کو ریڈ لائن پروجیکٹ پر کام کی رفتار مزید تیز کرنے کی ہدایت کی ہے۔

تفصیلات کے مطابق صوبائی وزیر ٹرانسپورٹ و چیئرمین ٹرانس کراچی شرجیل انعام میمن کی زیر صدارت ٹرانس کراچی بورڈ آف ڈائریکٹرز  کا اجلاس ہوا۔

اجلاس میں بورڈ کے 21 ویں اجلاس کے منٹس کی منظوری دی گئی جبکہ اجلاس میں بورڈ کی مختلف کمیٹیوں کی بھی منظوری دی گئی ۔

اجلاس میں بی آر ٹی ریڈ لائن پروجیکٹ کے انفراسٹرکچر ڈیولپمنٹ کی پیش رفت کا جائزہ بھی لیا گیا۔

بورڈ آف ڈائریکٹرز کو سی ای او واصف اجلال نے ریڈ لائن پروجیکٹ کی پیش رفت پر تفصیلی بریفنگ دی۔

 بریفنگ دیتے ہوئے کہا گیا کہ ملیر ہالٹ سے موسمیات تک لاٹ ون کنسٹرکشن زون انفراسٹرکچر کی تعمیر کے لیے کنٹریکٹر کے حوالے کردیا ہے۔

 بریفنگ دیتے ہوئے یہ بھی کہا گیا کہ ٹینک چوک سے چیک پوسٹ نمبر 6 تک 3 کلومیٹر اسٹارم واٹر ڈرین کا 60 فیصد کام مکمل ہوچکا ہے، ٹیپو سلطان سوسائٹی پر انڈر پاس کی تعمیر کے لیے کھدائی مکمل ہوچکی ہے۔

بریفنگ دیتے ہوئے کہا گیا کہ چیک پوسٹ نمبر 6 ، ریس کورس اور ٹیپو سلطان سوسائٹی پر بس اسٹیشن کی تعمیر کا کام شروع کر دیا ہے، ملیر ہالٹ بس ڈپو پر بھی کام کا آغاز کردیا ہے جبکہ موسمیات ڈپو کی تعمیر کے لیے متبادل جگہ کے لیے محکمہ ریو نیو سے رابطہ میں ہیں۔

بریفنگ دیتے ہوئے مزید کہا گیا کہ یوٹیلٹی انسٹالیشن کی منتقلی سب سے بڑی رکاوٹ ہے ، موسمیات سے نمائش چورنگی تک لاٹ ٹو پر کام تیزی سے جاری ہے ، این ای ڈی یونیورسٹی ، کرا چی یونیورسٹی اور شیخ زید اسٹیشنز کی بنیاد ڈال دی ہے۔

اجلاس کی صدارت کرتے ہوئے صوبائی وزیر شرجیل انعام میمن نے ٹرانس کراچی کو ریڈ لائن پروجیکٹ پر کام کی رفتار مزید تیز کرنے کی ہدایت کرتے ہوئے کہا کہ کنٹریکٹرز کے مسائل حل کئے جائیں تاکہ کام کی رفتار تیز ہوسکے۔

شرجیل انعام میمن نے سیکرٹری ٹرانسپورٹ کو ہدایت کرتے ہوئے کہا کہ کے الیکٹرک کے ساتھ یوٹیلیٹی کی منتقلی سے متعلق آئندہ ہفتہ اعلی سطحی اجلاس رکھا جائے۔

22 صوبائی وزیر شرجیل انعام میمن نے مزید کہا کہ کلومیٹر طویل بی آر ٹی ریڈ لائن کی تعمیر سے ملیر ، ضلع شرقی کے شہریوں کو سٹی سینٹر تک پہنچنے میں آسا نی ہوگی، ایک دو روز میں بی آر ٹی ریڈ لائن پر جاری کام کا معائنہ کرنے کے لیے دورہ کروں گا۔

اجلاس میں سیکریٹری ٹرانسپورٹ عبدالحلیم شیخ ، ایم ڈی سندھ ماس ٹرانزٹ اتھارٹی الطاف ساریو، جسٹس ریٹائرڈ محمد شائق عثمانی ، پروفیسر سروش حشمت لودھی ، سی ای او ٹرانس کراچی واصف اجلال ، سیکریٹری ٹرانس کراچی محمد اقبال لالانی اور دیگر نے شرکت کی۔