بلوچستان کے ضلع لسبیلہ کے علاقے بیلہ میں چینکی اسٹاپ کے قریب مسافر کوچ کھائی میں گرنے سے کم از کم 41 افراد جاں بحق اور متعدد زخمی ہو گئے۔

ریسکیو ذرائع کے مطابق مسافر بس پل کے پلر سے ٹکرا کر کھائی میں جاگری، حادثہ تیز رفتاری کے باعث پیش آیا۔

لسبیلہ میں بیلہ چونگی اسٹاپ کے قریب خوفناک حادثہ
کوچ کھائی میں جا گری 40 افراد جاں بحق #Lasbela #BOLNews pic.twitter.com/uGTI9dFkyK

— BOL Network (@BOLNETWORK) January 29, 2023

ریسکیو ذرائع کا کہنا ہے کہ کھائی میں گرنے کے بعد مسافر کوچ میں آگ لگ گئی، امدادی کارروائیوں کے دوران 39 افراد کی لاشیں نکال کر اسپتال منتقل کردی گئی ہیں۔

ذرائع نے بتایا کہ ہیوی مشینری کے ذریعے کوچ کا ملبہ ہٹانے کا عمل شروع ہوگیا، کرین کے ذریعے ملبہ ہٹا کر لاشیں نکالی جارہی ہیں۔

اسسٹنٹ کمشنر بیلہ حمزہ انجم

اسسٹنٹ کمشنر بیلہ حمزہ انجم نے بول نیوز سے گفتگو کرتے ہوئے بتایا کہ حادثے کی جگہ سے اب تک 22 افراد کی لاشیں نکال لی گئی ہیں اور 3 زخمیوں کو اسپتال منتقل کیا گیا ہے۔

حمزہ انجم نے مزید بتایا کہ حادثے کا شکار ہونے والی مسافر کوچ میں 48 افراد سوار تھے، جن میں سے 42 افراد کوئٹہ اور 6 مسافر خضدار سے سوار ہوئے تھے۔

وزیر داخلہ بلوچستان کا اظہار افسوس

وزیر داخلہ بلوچستان ضیاء اللہ لانگو نے لسبیلہ میں المناک ٹریفک حادثے پر افسوس کا اظہار کیا ہے۔

وزیر داخلہ نے زخمیوں کو ہر ممکن طبی امداد فراہم کرنے کی ہدایت دیتے ہوئے کہا کہ ایسے حادثات سے بچنے کے لیے مؤثر اقدامات کیے جانے چاہئیں، حفاظتی تدابیر، ٹریفک قوانین کی پاسداری ایسے حادثات سے بچنے کے لیے انتہائی اہم ہے۔

وزیر داخلہ ضیاء اللہ لانگو نے لواحقین سے دلی ہمدردی اور تعزیت کا اظہار کیا اور لواحقین کے لیے صبر جمیل کی دعا بھی کی۔