وزیراعلیٰ پنجاب چوہدری پرویز الہیٰ نے اپوزیشن کے ہر غیر آئینی ہتھکنڈے کا بھرپور مقابلہ کرنے کے عزم کا اعادہ کیا ہے۔

وزیراعلیٰ پرویز الہیٰ کی زیر صدارت اعلیٰ سطح کا مشاورتی اجلاس منعقد ہوا جس میں باہمی دلچسپی کے امور اور سیاسی صورتحال پر تبادلہ خیال کیا گیا اور پنجاب اسمبلی میں نمبر گیم کے حوالے سے بھی بات چیت کی گئی۔

اپوزیشن کے پاس نمبرز ہی پورے نہیں ہے

اجلاس میں پرویز الہیٰ نے اپوزیشن کے ہر غیر آئینی ہتھکنڈے کا بھرپور مقابلہ کرنے کے عزم کا اعادہ کرتے ہوئے کہا کہ پنجاب میں اپوزیشن اقتدار کے خواب دیکھ رہی ہے، خوابوں میں گم اپوزیشن کے پاس نمبرز ہی پورے نہیں۔

وزیر اعلیٰ نے کہا کہ پنجاب میں ن لیگ کو پہلے بھی مار پڑی اور آئندہ بھی انہیں چھپنے کی جگہ نہیں ملے گی۔

کوئی کسی خوش فہمی میں نہ رہے، ہم عمران خان کے ساتھ ہیں

انہوں نے کہا کہ پروپیگنڈا کرنے والی فیکٹری ن لیگ کے گھر لگی ہوئی ہے، پروپیگنڈا کرنے والے جان لیں، ہم ایک ہیں اور ایک رہیں گے۔

چوہدری پرویز الہیٰ نے کہا کہ کوئی کسی خوش فہمی میں نہ رہے، ہم عمران خان کے ساتھ ہیں، غلط فہمیاں پیدا کرنے والے پہلے کی طرح ناکام رہیں گے۔

وزیراعلیٰ پنجاب نے مزید کہا کہ ن لیگ کے دعوے صرف ہوائی قلعے ہیں، وفاقی حکومت کی بدترین کارکردگی پر پورا ملک سراپا احتجاج ہے، وفاقی حکومت کی نااہلی اور نالائقی کی سزا 22 کروڑ عوام بھگت رہے ہیں۔

خیال رہے کہ اجلاس میں اسپیکر پنجاب اسمبلی محمد سبطین خان، صوبائی وزراء محمد بشارت راجہ اور میاں محمودالرشید نے شرکت کی۔

وزیراعلیٰ پنجاب کیخلاف عدم اعتماد کا معاملہ، اسمبلی میں نمبر گیم سامنے آگئی

وزیراعلیٰ پنجاب چوہدری پرویز الہیٰ کیخلاف عدم اعتماد کے معاملے پر پنجاب اسمبلی میں نمبر گیم سامنے آگئی، پرویز الہیٰ کو ایوان سے اعتماد کا ووٹ لینے میں چیلنج کا سامنا ہے۔

ذرائع کے مطابق چوہدری پرویز الہیٰ کو اعتماد کے لئے 186 ارکان کے ووٹ درکار اور پنجاب اسمبلی کے 371 کے ایوان میں تحریک انصاف کے 181 ارکان ہیں جن میں ایک آزاد ارکان بھی شامل ہے جبکہ پی ٹی آئی ایم پی اے مومنہ وحید ناراض ہیں البتہ اب دیکھنا یہ ہے وہ ووٹ ڈالتی ہیں یہاں نہیں  جبکہ تحریک انصاف کو مسلم لیگ (ق) کے 10 ارکان کی حمایت بھی حاصل ہے، اس طرح پنجاب میں حکومتی اتحاد کو 190 ارکان کی حمایت حاصل ہے۔