آئی جی سندھ غلام نبی میمن نے کہا ہے کہ عوام کے جان و مال کا تحفظ ہماری اولین ترجیح ہے۔

تفصیلات کے مطابق آئی جی سندھ غلام نبی میمن کی زیر صدارت صوبے بھر میں فول پروف سیکیورٹی کے حوالے سے اعلیٰ سطحیٰ کا  اجلاس ہوا۔

اجلاس میں آئی جی سندھ نے ہدایات دیں سندھ میں مختلف ترقیاتی پروجیکٹس اور دیگر امور سے منسلک چائینیز باشندگان/غیر ملکیوں کے سیکیورٹی امور و اقدامات کو آڈٹ کیا جائے بصورت دیگر تمام تر ذمہ داری سپروائزری افسران پر عائد کی جائیگی۔

  انہوں نے کہا کہ پولیس لائنز اور ان میں موجود مساجد کی سیکیورٹی مزید سخت کرنیکے ساتھ ساتھ، اہم سرکاری دفاتر، عمارتیں، ٹریننگ سنٹرز،ا سٹیبلشمنٹ ودیگر کی سیکیورٹی پر بھی خصوصی فوکس رکھا جائے اور سیکیورٹی کے مجموعی امور کو تین حصاروں میں ترتیب دیا جائے اس اقدام کو فی الفور نافذ العمل بنایا جائے۔

آئی جی سندھ نے سیکیورٹی کے مجموعی امور و اقدامات کو ریڈ الرٹ کرنے کے احکامات دیتے ہوئے کہا کہ عوام کے جان و مال کا خیال رکھنا اور مکمل تحفظ دینا ہماری اولین ترجیح ہے۔

انہوں نے کہا کہ کے پی او واقعہ انتہائی لرزہ خیز تھا جسکی تفتیش کو منطقی انجام تک پہنچائیں گے اور جہنم واصل ہونیوالے دہشت گردوں کے سہولتکار بھی جلد کیفرکردار کو پہنچیں گے۔

ان کا کہنا تھا کہ میرے نزدیک اس وقت سیکیورٹی چیلنجز سرفہرست ہیں لٰہذا پولیس افسران و اہلکار کے پی او واقعہ کو سنجیدگی سے لیں اور سیکیورٹی احکامات پر عمل درآمد پر فوکس رکھیں۔

آئی جی سندھ نے وقوعے کی تفتیش کے لیئے ہائی پاورڈ کمیٹی تشکیل دینے کے علاوہ ریوارڈ کمیٹی بھی ایڈیشنل آئی جی۔ سی ٹی ڈی کی سربراہی میں تشکیل دی ہے۔

 کمیٹی کے دیگر ممبران میں شامل ڈی آئی جی ہیڈکوارٹرز سندھ، ڈی آئی جی اسٹیبلشمنٹ، اے آئی جیز ویلفیئر اور اسٹیبلشمنٹ کے پی او حملے کے دوران عمدہ کارکردگی کا مظاہرہ کرنیوالے افسران اور جوانوں کے لیئے انعامات اور اسناد کی فہرست تیار کرینگے۔

آئی جی سندھ نے دہشت گردانہ حملے پر بروقت اور نتیجہ خیز ریسپانس دینے پر ڈی آئی جیز، ایس ایس پیز اور ڈی ایس پی سمیت دیگر افسران اور جوانوں کو شاباش دی اور انکے اس اقدام کو لائق ستائش و تعریف قرار دیا۔

انہوں نے کہا کہ ہمارے نڈر اور بہادر افسران و اہلکاروں کے بہتر ریسپانس سے بہت سی زندگیاں محفوظ رہیں۔

آئی جی سندھ غلام نبی میمن نے کہا کہ شہیدوں کے ورثاء کا خیال رکھا جائے جبکہ تمام زخمیوں کو معیاری طبی سہولیات فراہم کو یقینی بنایا جائے۔

اجلاس میں سندھ کی تمام رینج کے سینئر موسٹ اور سینئر پولیس افسران نے براہ راست/ذریعہ ویڈیو لنک شرکت کی۔