اسلام آباد: حکومت سویڈن میں قرآن پاک کی بے حرمتی کے خلاف ملک گیر احتجاجی مظاہرے کرنے کے لیے 7 جولائی کو یوم تقدس قرآن منائے گی اور اس سے ایک روز قبل پارلیمنٹ کا مشترکہ اجلاس بلائے گی۔

یہ فیصلہ وزیراعظم شہباز شریف کی زیر صدارت سویڈن میں قرآن پاک کی بے حرمتی کے معاملے پر ہونے والے اجلاس میں کیا گیا۔

اجلاس میں فیصلہ کیا گیا کہ جمعہ کو ملک بھر میں اس اقدام کی مذمت میں احتجاجی ریلیاں نکالی جائیں گی۔

وزیراعظم نے تمام سیاسی جماعتوں سمیت قوم سے اپیل کی کہ وہ شرپسند ذہنوں کو متحدہ پیغام دینے کے لیے احتجاج میں شرکت کریں۔

اس کے علاوہ حکومت 6 جولائی کو پارلیمنٹ کا مشترکہ اجلاس بھی بلائے گی جس میں اس معاملے پر قومی حکمت عملی مرتب کی جائے گی اور پارلیمانی فورم کے ذریعے قوم کے جذبات و احساسات کی نمائندگی کی جائے گی۔

مشترکہ اجلاس میں قرآن پاک کی بے حرمتی کے خلاف مذمتی قرارداد بھی منظور کی جائے گی۔

شہباز شریف نے کہا کہ قرآن پاک کی حرمت مسلمانوں کے عقیدے کا حصہ ہے جس کے لیے سب متحد ہیں۔گمراہ ذہن اسلام فوبیا کے منفی رجحان کو ہوا دینے کے مذموم ایجنڈے پر گامزن ہیں۔

انہوں نے کہا کہ امن اور بقائے باہمی پر یقین رکھنے والی قوموں اور قیادت کو اسلام فوبیا اور مذہبی تعصبات سے متاثر ہونے والی متشدد قوتوں پر قابو پانا چاہیے۔

وزیراعظم شہباز شریف نے مزید کہا کہ مذہب، مقدس ہستیوں، عقائد اور نظریات کو نشانہ بنانے والے متشدد ذہنیت درحقیقت عالمی امن کے دشمن ہیں۔امن اور بین المذاہب ہم آہنگی پر یقین رکھنے والی قوتیں ایسے منفی رجحانات سے نجات کے لیے بین الاقوامی سطح پر اپنا کردار ادا کریں۔