وزیر اعلیٰ پنجاب مریم نواز شریف نے ارکان اسمبلی کو اپنے حلقوں میں روٹی و نان کے نرخ کی نگرانی کرنے کی ہدایت دے دی۔

وزیر اعلیٰ مریم نواز کی مختلف اضلاع کے ارکان صوبائی اسمبلی سے ملاقات ہوئی جس میں عوامی مسائل، ضروریات اور ڈویلپمنٹ پراجیکٹ پر تبادلہ خیال کیا گیا۔

ارکان اسمبلی نے مختصر وقت میں متعدد عوام دوست پراجیکٹس شروع کرنے پر وزیر اعلیٰ پنجاب مریم نواز کو خراجِ تحسین پیش کیا اور کہا کہ مریم نواز توقعات سے بڑھ کر تیز رفتاری سے کام کررہی ہیں۔

ملاقات کے دوران وزیر اعلیٰ پنجاب مریم نواز نے گفتگو کرتے ہوئے کہا کہ ارکان اسمبلی اپنے حلقے میں سرکاری نرخ پر روٹی اور نان کی فروخت کی مانیٹرنگ  کریں۔

انہوں نے کہا کہ صوبہ بھر کے دیہی اور بنیادی مراکز صحت کو 6 ماہ کے اندر ری ویمپ کیا جائے گا، 100 فیصد فری ادویات اورہوم ڈلیوری جلد شروع کردی جائے گی۔

مریم نواز نے مزید کہا کہ صوبے میں 600 سڑکوں کی تعمیر ومرمت ہوگی، 5 ایکسپریس وے اور 3 موٹر ویز بنائیں گے اور طلباء کیلئے 20 ہزار موٹر بائیکس کی فراہمی کا پروگرام شروع کیا۔

ملاقات کرنے والوں میں ارکان صوبائی اسمبلی زاہد اکرم، محمد اجمل خان، محمد کاشف، آغا علی حیدر شامل تھے جبکہ سینئر صوبائی وزیر مریم اورنگزیب، پرویز رشید اور معاون خصوصی ذیشان ملک بھی اس موقع پر موجود تھے۔