اسلام آباد: عالمی بینک گروپ کے صدر نے وزیر خزانہ محمد اورنگزیب کو معاشی استحکام اور محصولات بڑھانے کے لیے اصلاحات اور ڈیجٹلائزیشن پروگرام میں مکمل تعاون کی یقین دہانی کرائی ہے۔

وزیر خزانہ محمد اورنگزیب سے عالمی بینک گروپ کے صدر اجے بنگا کی ملاقات ہوئی جس میں وزیر خزانہ نے 9 ماہ کے ایس بی اے پروگرام کے تحت پاکستان کی ترقی پر بات کی۔

وفاقی وزیر خزانہ نے ٹیکس، توانائی اور نجکاری کے ترجیحی شعبوں میں جاری اصلاحات پر روشنی ڈالی اور دونوں فریقین نے 10 سال کے لیے رولنگ کنٹری فریم ورک پلان کی ضرورت پر اتفاق کیا۔

وزارت خزانہ نے بتایا کہ عالمی بینک کے صدر نے معیشت کے استحکام مکمل حمایت کا یقین دلایا اور وزیر خزانہ محمد اورنگزیب نے صدر اجے بنگا  کو دورہ پاکستان کی دعوت دی۔

دوسری جانب وفاقی وزیر خزانہ محمد اورنگزیب نے ترقیاتی فننانس کارپوریشن (ڈی ایف سی) کے سربراہ سکاٹ ناتھن سے بھی ملاقات کی جس میں پاکستان میں ڈی ایف سی کی سرمایہ کاری میں توسیع پر تبادلہ خیال کیا گیا۔

ملاقات کے دوران مسٹر سکاٹ ناتھن نے پاکستان کے موجودہ مسائل کے خوشگوار حل کی یقین دہانی کروائی۔

وزیرِ خزانہ نے کہا کہ حکومت نجی شعبے کی سرمایہ کاری اور پی پی پی کی صلاحیت سے فائدہ اٹھانے کے لیے جدید فنانسنگ ماڈلز کی حوصلہ افزائی کر رہی ہے، حکومتِ پاکستان کسی بھی مقامی/غیر ملکی سرمایہ کار کی جانب سے سرمایہ کاری کے اقدامات کے لیے ہر ممکن تعاون فراہم کرنے کے لیے پرعزم ہے۔