اسلام آباد: وزیراعلیٰ خیبرپختونخوا علی امین گنڈاپور نے کہا کہ سستی روٹی پر عمل درآمد کراکر دکھاؤں گا، اگر عمل درآمد نہ کراسکا تو کرسی چھوڑ دوں گا۔

وزیر اعلیٰ کے پی کے علی امین گنڈا پور نے انسداد دہشت گردی عدالت اسلام آباد میں پیشی کے بعد میڈیا سے گفتگو کرتے ہوئے کہا کہ تمام تر کیسز جھوٹے ہیں، ہم حقیقی آزادی کی جنگ لڑ رہے ہیں، یہ لوگ بتا رہے ہیں کہ اگر ایک پارٹی میں رہے تو فارم 45 کو فارم 47 میں تبدیل کر دیا جائے گا۔

انہوں نے کہا کہ قوم اور ملک کو اندھیروں میں نہ دھکیلیں، پی ڈی ایم ون کے بعد اب پی ڈی ایم ٹو سے ملک و قوم پر تجربے کرنا بند کریں۔

علی امین گنڈا پور نے کہا کہ دیر آئے درست آئے، ان کو اب احساس ہوا ہے کہ غیر قانونی طور پر کسی کے گھر نہیں جاتے، میں ان کی فیملیز سے کہتا ہوں ان کو سمجھاؤ کہ ان حرکتوں سے باز آجاؤ، اس طرح سے کسی کا منہ بند نہیں کیا جا سکتا۔

انکا کہنا تھا کہ بانی پی ٹی آئی نے کہا میں پاکستان کی خاطر ان کے ساتھ بیٹھنے کو تیار ہوں، جب بیٹھنے کا وقت تھا تب یہ لوگ پکڑ دھکڑ کر رہے تھے، مینڈیٹ بھی ہمارا چوری ہوا ہے۔

وزیراعلیٰ خیبرپختونخوا نے کہا کہ مریم نواز کی حکومت ٹک ٹاک پر چل رہی ہے،عوام کے لیے کام کرو اور جو حکم کرو اس پر عمل کرواؤ، ہم اگر اپنے احکامات پر عمل نہ کروا سکا تو کرسی چھوڑ دوں گا۔

علی امین گنڈا پور نے مزید کہا کہ معاہدے ہوتے ہیں، اچھائی کیلئے معاہدہ کرنا کوئی بری بات نہیں، ایسے معاہدوں کو ڈیل کا نام دینا غلط ہے۔