لاہور میں مشتعل ہجوم کے درمیان خاتون کی جان بچانے والی خاتون پولیس افسر اسسٹنٹ سپرنٹنڈنٹ پولیس شہر بانو نقوی کی تنخواہ جان کر آپ حیران رہ جائیں گے۔

حال ہی میں اپنے دیے گئے ایک انٹرویو میں اے ایس پی شہر بانو سے میزبان نے سوال کیا کہ اُن کی سرکاری تنخواہ کتنی ہے؟

جس کے جواب میں سیدہ شہر بانو نے بتایا کہ میری سرکاری تنخواہ 1 لاکھ 40 ہزار روپے ہے ، اس کے علاوہ دیگر مراعات میں ہمیں پیٹرول، الاؤنسز، یونیفارم الاؤنس، سرکاری گاڑی دی جاتی ہے۔

انہوں نے کہا کہ جب سرکار آپ کا اتنا خیال رکھے تو پھر ذمہ داریوں میں کمی کی کوئی چیز نہیں رہ جاتی۔

شہر بانو نقوی کون ہیں؟

25 فروری کو صوبہ پنجاب کے صوبائی دارالحکومت لاہور کے کاروباری علاقے اچھرہ میں عربی حروف تہجی والا لباس پہننے پر مشتعل ہجوم نے خاتون پر توہین مذہب کا الزام لگایا، خاتون پولیس افسر کی بروقت کارروائی نے صورتحال کو نہ صرف بگڑنے سے بچایا بلکہ خاتون کو بھی مشتعل ہجوم سے بحفاظت نکال لیا تھا۔

پولیس کے مطابق خاتون اپنے شوہر کے ہمراہ شاپنگ کرنے گئی تھی، خاتون نے ایک لباس پہنا ہوا تھا جس میں کچھ عربی حروف تہجی لکھے ہوئے تھے جس پر لوگوں نے سخت ناپسندیدگی کا اظہار کیا اور خاتون سے فوری طور پر لباس کو تبدیل کرنے کا مطالبہ کیا تھا۔

اس صورتحال میں پنجاب پولیس کی خاتون پولیس آفیسر اے ایس پی گلبرگ شہر بانو نقوی 15 ہیلپ لائن کی کال پر جائے وقوع پہنچیں، ان کی جانب سے بروقت کارروائی نے صورتحال کو نہ صرف بگڑنے سے بچایا بلکہ خاتون کو بھی مشتعل ہجوم سے بحفاظت باہر نکال لیا تھا۔

ان کے اس اقدام پر سوشل میڈیا پر ان کی بہادری کی تعریفیں کی جارہی تھیں اور انہیں عالمی سطح پر بھی سراہا گیا تھا۔